سیار بن سلامہ بیان کرتے ہیں کہ میں (اپنے والد کے ساتھ) ابوبرزہ رضی اللہ عنہ کے پاس گیا، میرے والد محترم نے ان سے پوچھا کہ رسول اللہ صلی اللہ علیہ وسلم فرض نمازیں کیسے پڑھا کرتے تھے؟ انہوں نے فرمایا: ”آپ صلی اللہ علیہ وسلم ظہر کی نماز، جسے تم «الْأُولَىٰ» (پیشین) کہتے ہو، اس وقت پڑھتے تھے جب سورج ڈھلتا تھا اور عصر کی نماز اس وقت پڑھتے تھے کہ (نماز کے بعد) ہم میں سے کوئی شخص مدینے کی انتہائی دور والی مضافاتی بستی میں اپنے گھر واپس پہنچ جاتا تھا جبکہ سورج ابھی زندہ ہوتا تھا، اور میں بھول گیا کہ مغرب کے بارے میں انہوں نے کیا فرمایا۔ اور آپ صلی اللہ علیہ وسلم اچھا سمجھتے تھے کہ عشاء کی نماز کو، جسے تم «الْعَتَمَةِ» (اندھیری) کہتے ہو، دیر سے پڑھیں۔ اور آپ صلی اللہ علیہ وسلم عشاء کی نماز سے پہلے سونے اور بعد میں باتیں کرنے کو ناپسند کرتے تھے۔ اور آپ صلی اللہ علیہ وسلم صبح کی نماز سے فارغ ہوتے تھے تو آدمی اپنے ہم نشین کو پہچان سکتا تھا، اور آپ صلی اللہ علیہ وسلم ساٹھ سے سو آیات تک (نماز فجر میں) تلاوت فرمایا کرتے تھے۔“ [سنن نسائي/كتاب المواقيت/حدیث: 526]