حضرت عبدالرحمن بن ابی لیلیٰ رحمہ اللہ بیان کرتے ہیں کہ حضرت سہل بن حنیف اور حضرت قیس بن سعد بن عبادہ رضی اللہ عنہما قادسیہ مقام پر تھے کہ ایک جنازہ گزرا، وہ دونوں کھڑے ہو گئے۔ ان سے کہا گیا: یہ جنازہ تو اس علاقے والوں (یعنی ذمی کافروں) کا ہے؟ تو ان دونوں نے فرمایا: رسول اللہ صلی اللہ علیہ وسلم کے پاس سے ایک جنازہ گزرا تو آپ کھڑے ہو گئے۔ آپ سے کہا گیا: یہ تو ایک یہودی کا جنازہ ہے! آپ صلی اللہ علیہ وسلم نے فرمایا: ”کیا یہ انسانی جان نہیں تھی؟“ [سنن نسائي/كتاب الجنائز/حدیث: 1922]

حضرت جابر بن عبداللہ رضی اللہ عنہ فرماتے ہیں کہ ہمارے پاس سے ایک جنازہ گزرا تو رسول اللہ صلی اللہ علیہ وسلم کھڑے ہو گئے، ہم بھی آپ کے ساتھ کھڑے ہو گئے۔ (بعد میں) میں نے آپ سے کہا: اے اللہ کے رسول! یہ تو ایک یہودی عورت کا جنازہ تھا! آپ صلی اللہ علیہ وسلم نے فرمایا: ”موت گھبراہٹ والی چیز ہے، لہٰذا جب تم کوئی جنازہ دیکھو تو کھڑے ہو جاؤ۔“ حدیث کے یہ الفاظ خالد راوی کے بیان کردہ ہیں۔ [سنن نسائي/كتاب الجنائز/حدیث: 1923]