سیدنا ابوسعید خدری رضی اللہ عنہ نے بیان کیا کہ رسول اللہ صلی اللہ علیہ وسلم نے ” «الْمُزَابَنَةِ» مزابنہ اور «الْمُحَاقَلَةِ» محاقلہ سے منع فرمایا“، «الْمُزَابَنَةُ» مزابنہ درخت پر موجود کھجور اتری ہوئی کھجور کے بدلے میں خریدنے کو کہتے ہیں۔ [اللؤلؤ والمرجان/كتاب البيوع/حدیث: 995]

نافع رحمہ اللہ نے بیان کیا کہ سیدنا ابن عمر رضی اللہ عنہما اپنے کھیتوں کو نبی کریم صلی اللہ علیہ وسلم ، سیدنا ابوبکر، سیدنا عمر، سیدنا عثمان رضی اللہ عنہم کے عہد میں اور سیدنا معاویہ رضی اللہ عنہ کے ابتدائی عہدِ خلافت میں کرایہ پر دیتے تھے۔ پھر سیدنا رافع بن خدیج رضی اللہ عنہ کے واسطہ سے بیان کیا گیا کہ نبی کریم صلی اللہ علیہ وسلم نے ”کھیتوں کو کرایہ پر دینے سے منع کیا تھا“، (یہ سن کر) سیدنا ابن عمر رضی اللہ عنہما، سیدنا رافع بن خدیج رضی اللہ عنہ کے پاس گئے، میں بھی ان کے ساتھ تھا، سیدنا ابن عمر رضی اللہ عنہما نے ان سے پوچھا تو انہوں نے فرمایا کہ نبی کریم صلی اللہ علیہ وسلم نے ”کھیتوں کو کرایہ پر دینے سے منع فرمایا ہے“، اس پر سیدنا ابن عمر رضی اللہ عنہما نے کہا کہ آپ کو معلوم ہے نبی کریم صلی اللہ علیہ وسلم کے عہد میں ہم اپنے کھیتوں کو اس پیداوار کے بدل جو نالیوں پر ہو اور تھوڑی گھاس کے بدل دیا کرتے تھے۔ [اللؤلؤ والمرجان/كتاب البيوع/حدیث: 996]

سیدنا ظہیر بن رافع رضی اللہ عنہ نے بیان کیا کہ نبی کریم صلی اللہ علیہ وسلم نے ہمیں ایک ایسے کام سے منع کیا تھا جس میں ہمارا (بظاہر ذاتی) فائدہ تھا (حدیث کے راوی سیدنا رافع بن خدیج رضی اللہ عنہ نے کہا) اس پر میں نے کہا کہ رسول اللہ صلی اللہ علیہ وسلم نے جو کچھ بھی فرمایا وہ حق ہے، سیدنا ظہیر رضی اللہ عنہ نے بیان کیا کہ مجھے رسول اللہ صلی اللہ علیہ وسلم نے بلایا اور دریافت فرمایا: ”تم لوگ اپنے کھیتوں کا معاملہ کس طرح کرتے ہو؟“ میں نے کہا کہ ہم اپنے کھیتوں کو (بونے کے لیے) نہر کے قریب کی زمین کی شرط پر دے دیتے ہیں، اسی طرح کھجور اور جو کے چند وسق پر، یہ سن کر آپ صلی اللہ علیہ وسلم نے فرمایا: ”ایسا نہ کرو، یا خود اس میں کھیتی کیا کرو یا دوسروں سے کراؤ، ورنہ اسے یوں خالی ہی چھوڑ دو۔“ سیدنا رافع رضی اللہ عنہ نے بیان کیا کہ میں نے کہا: (آپ کا یہ فرمان) میں نے سنا اور مان لیا۔ [اللؤلؤ والمرجان/كتاب البيوع/حدیث: 997]

سیدنا ابن عباس رضی اللہ عنہما نے بیان کیا کہ نبی کریم صلی اللہ علیہ وسلم نے اس سے (یعنی کرایہ پر دینے سے) نہیں روکا بلکہ آپ صلی اللہ علیہ وسلم نے صرف یہ فرمایا تھا کہ: ”اگر کوئی شخص اپنے بھائی کو (اپنی زمین) مفت دے دے تو یہ اس سے بہتر ہے کہ اس کا محصول لے۔“ [اللؤلؤ والمرجان/كتاب البيوع/حدیث: 998]