یوسف بن مازن سے روایت ہے کہ ایک شخص نے سیدنا علی رضی اللہ عنہ سے عرض کیا: اے امیر المؤمنین! آپ ہمیں رسول اللہ صلی اللہ علیہ وآلہ وسلم کا حلیہ مبارک بیان کریں، انہوں نے کہا: آپ صلی اللہ علیہ وآلہ وسلم بہت زیادہ طویل قامت نہ تھے، آپ صلی اللہ علیہ وآلہ وسلم متوسط قد سے قدرے دراز تھے، جب آپ صلی اللہ علیہ وآلہ وسلم دوسروں کے ساتھ کھڑے ہوتے توان سے نمایاں لگتے، آپ صلی اللہ علیہ وآلہ وسلم کی رنگت چمکیلی سفید تھی، آپ صلی اللہ علیہ وآلہ وسلم کا سر مبارک بڑا تھا، آپ صلی اللہ علیہ وآلہ وسلم کا چہرہ انور خوب روشن تھا، ابرو آپس میں ملے ہوئے نہ تھے، پلکیں گھنی اور طویل تھیں، آپ صلی اللہ علیہ وآلہ وسلم کی ہتھیلیاں اور قدم مبارک بھرے بھرے تھے،جب چلتے تو قوت سے یوں چلتے جیسے بلندی سے پستی کی طرف جا رہے ہوں، آپ کے چہرے پرپسینہ موتیوں کی طرح چمکتا تھا، میرے ماں باپ آپ صلی اللہ علیہ وآلہ وسلم پر فدا ہوں۔ میں نے آپ صلی اللہ علیہ وآلہ وسلم سے پہلے یا آپ صلی اللہ علیہ وآلہ وسلم کے بعد آپ صلی اللہ علیہ وآلہ وسلم جیسا کوئی آدمی نہیں دیکھا۔ [الفتح الربانی/حدیث: 11120]

محمد بن علی اپنے باپ سیدنا علی رضی اللہ عنہ سے بیان کرتے ہیں کہ رسول اللہ صلی اللہ علیہ وآلہ وسلم کا سر مبارک بڑا، آنکھیں خوب موٹی، پلکیں طویل اور آنکھوں میں سرخ ڈورے تھے۔ آپ صلی اللہ علیہ وآلہ وسلم کی داڑھی گھنی تھی، رنگ خوب روشن تھا، آپ چلتے تو ذرا سامنے کو جھک کر چلتے، گویا آپ بلندی سے اتر رہے ہیں، کسی طرف متوجہ ہوتے تو پوری طرح ادھر مڑتے، آپ کی ہتھیلیاں اور قدم بھرے بھرے تھے۔ [الفتح الربانی/حدیث: 11121]

۔(دوسری سند) نافع بن جبیربن مطعم سے روایت ہے کہ سیدنا علی رضی اللہ عنہ نے کہا: رسول اللہ صلی اللہ علیہ وآلہ وسلم نہ تو بہت زیادہ دراز قد تھے اور نہ ہی پست قد تھے، آپ صلی اللہ علیہ وآلہ وسلم کا سر بڑا اور داڑھی گھنی تھی، آپ صلی اللہ علیہ وآلہ وسلم کی ہتھیلیاں اور پاؤں پر گوشت تھے، آپ صلی اللہ علیہ وآلہ وسلم کا چہرہ انور سرخی مائل سفید تھا، اعضاء کی ہڈیاں مضبوط تھیں، سینہ سے ناف تک بالوں کی لمبی لکیر تھی، آپ صلی اللہ علیہ وآلہ وسلم چلتے تو ذرا جھک کر یوں چلتے گویا آپ صلی اللہ علیہ وآلہ وسلم بلندی سے اتر رہے ہیں، میں نے آپ سے پہلے اور آپ صلی اللہ علیہ وآلہ وسلم کے بعد آپ صلی اللہ علیہ وآلہ وسلم جیسا کوئی آدمی نہیں دیکھا۔ [الفتح الربانی/حدیث: 11122]

ابو صالح مولی التوأمہ سے مروی ہے، وہ کہتے ہیں: میں نے سیدنا ابو ہریرہ رضی اللہ عنہ کو سنا، وہ نبی کریم صلی اللہ علیہ وآلہ وسلم کا حلیہ مبارک بیان کر رہے تھے، انھوں نے کہا:آپ صلی اللہ علیہ وآلہ وسلم کے ہاتھ طویل (یا عریض) تھے، آنکھوں کی پلکیں بھی طویل تھیں، کندھوں کے درمیان تھوڑا سا نمایاں فاصلہ تھا (یعنی آپ صلی اللہ علیہ وآلہ وسلم کا سینہ چوڑا تھا)، آپ صلی اللہ علیہ وآلہ وسلم جس طرف بھی مڑتے، پوری طرح مڑتے اور متوجہ ہوتے۔روح راوی نے اپنی حدیث میں کہا: میرے ماں باپ آپ پر نثار ہوں، آپ عادۃًیا تکلفاً فحش گو نہ تھے، نہ ہی آپ صلی اللہ علیہ وآلہ وسلم بازاروں (اور گلیوں) میں بلند آواز سے بولتے تھے، آپ کی ہتھیلیاں اور قدم مبارک گوشت سے بھرے ہوئے تھے، میں نے آپ کے بعد آپ جیسا کوئی نہیں دیکھا۔ [الفتح الربانی/حدیث: 11123]

سیدنا براء بن عازب رضی اللہ عنہ کا بیان ہے کہ رسول اللہ صلی اللہ علیہ وآلہ وسلم سیدھے بالوں والے تھے، آپ صلی اللہ علیہ وآلہ وسلم کا قد درمیانہ تھا، آپ کے کندھوں کے درمیان تھوڑا سا فاصلہ تھا (یعنی آپ صلی اللہ علیہ وآلہ وسلم کا سینہ کشادہ تھا)، آپ صلی اللہ علیہ وآلہ وسلم کے سر کے بال کانوں کی لووں تک طویل تھے، ایک بار آپ صلی اللہ علیہ وآلہ وسلم نے سرخ پوشاک زیب تن کی ہوئی تھی، میں نے آپ سے بڑھ کر خوبصورت آدمی کبھی نہیں دیکھا۔ [الفتح الربانی/حدیث: 11124]

ربیعہ بن ابی عبدالرحمن سے روایت ہے کہ انہوں نے سیدنا انس بن مالک رضی اللہ عنہ کو سنا وہ نبی کریم صلی اللہ علیہ وآلہ وسلم کا حلیہ مبارک اپنے ہی انداز میں بیان کر رہے تھے، میں نے سیدنا انس رضی اللہ عنہ کو سنا، انھوں نے کہا: نبی کریم صلی اللہ علیہ وآلہ وسلم لوگوں میں میانہ قد والے تھے، نہ بہت پست قد تھے، نہ بہت زیادہ طویل قامت، آپ صلی اللہ علیہ وآلہ وسلم کا رنگ چمکیلا تھا، نہ گندم گوںتھا، نہ بالکل سفید، بلکہ گورا چمک دار تھا، آپ صلی اللہ علیہ وآلہ وسلم کے بال نہ بالکل سیدھے تھے اور نہ سخت گھنگھریالے، بلکہ ہلکا سا خم لیے ہوئے تھے۔ چالیس برس کی عمر میں نبوت سے سرفراز ہوئے، اس کے بعد آپ صلی اللہ علیہ وآلہ وسلم نے دس سال مکہ مکرمہ میں اور دس سال مدینہ منورہ میں قیام کیا، ساٹھ برس کی عمر میں وفات پائی،آپ کے سر اور داڑھی میں سفید بال بیس بھی نہ تھے۔ [الفتح الربانی/حدیث: 11125]

سماک کہتے ہیں: میں نے سیدنا جابر بن سمرہ رضی اللہ عنہ کو کہتے سنا کہ رسول اللہ صلی اللہ علیہ وآلہ وسلم کا منہ کشادہ تھا، آنکھوں کی سفیدی میں سرخی تھی اور ایڑیوں کا گوشت کم تھا۔ امام شعبہ کہتے ہیں: میں نے سماک سے دریافت کیا کہ ضَلِیعُ الْفَمِ کا کیا معنی ہے؟ انہوں نے کہا: کشادہ منہ والا۔ میں نے پوچھا: أَشْکَلُ الْعَیْنِ سے کیا مراد ہے؟ انہوں نے کہا: طویل پلکوں والا۔میں نے دریافت کیا کہ مَنْہُوسُ الْعَقِبِ کا کیا معنیٰ ہے؟ انہوں نے کہا: وہ جس کی ایڑیوں کا گوشت کم ہو۔ [الفتح الربانی/حدیث: 11126]

سیدنا جابر بن سمرہ رضی اللہ عنہ کا بیان ہے کہ نبی کریم صلی اللہ علیہ وآلہ وسلم کی پنڈلیاں دوسرے اعضا کے مطابق مناسب حد تک باریک تھیں۔ آپ صلی اللہ علیہ وآلہ وسلم کھلکھلا کر نہیں ہنستے تھے، بلکہ صرف مسکراتے تھے۔ جب میں آپ صلی اللہ علیہ وآلہ وسلم کو دیکھتاتویوں محسوس ہوتا کہ آپ صلی اللہ علیہ وآلہ وسلم نے آنکھوں میں سرمہ ڈالا ہوا ہے، جبکہ آپ صلی اللہ علیہ وآلہ وسلم نے سرمہ نہ ڈالا ہوتا تھا۔ (یعنی آپ صلی اللہ علیہ وآلہ وسلم کی آنکھیں قدرتی طور پر سرمگیں تھیں)۔ [الفتح الربانی/حدیث: 11127]

سیدنا جابر بن سمرہ رضی اللہ عنہ ہی کا بیان ہے کہ نبی صلی اللہ علیہ وآلہ وسلم کے پاؤں کے انگوٹھے کے ساتھ والی انگلی، انگوٹھے سے لمبی تھی۔ [الفتح الربانی/حدیث: 11128]

اشعث نے نبی کریم صلی اللہ علیہ وآلہ وسلم کو دیکھنے والے بنو مالک بن کنانہ کے ایک بزرگ سے کہا: تم ہمارے سامنے رسول اللہ صلی اللہ علیہ وآلہ وسلم کا حلیہ بیان کرو، اس نے کہا: آپ سرخ رنگ کی دو چادریں زیب تن کیے، میانہ قامت، پرگوشت جسم، خوب رو، بال ازحد سیاہ، رنگ انتہائی گورا، اور سر کے بال لمبے تھے۔ [الفتح الربانی/حدیث: 11129]