سیدنا نعمان بن بشیر رضی اللہ عنہما بیان کرتے ہیں: سیدنا بشیر بن سعد رضی اللہ عنہما نبی اکرم صلی اللہ علیہ وسلم کی خدمت میں حاضر ہوئے۔ انہوں نے عرض کی: میں نے اپنے اس بیٹے کو یہ غلام عطیے کے طور پر دیا ہے۔ نبی اکرم صلی اللہ علیہ وسلم نے دریافت کیا: ”کیا تم نے اپنی تمام اولاد کو اسی طرح عطیہ دیا ہے؟“ انہوں نے جواب دیا: جی نہیں۔ نبی اکرم صلی اللہ علیہ وسلم نے فرمایا: ”تو تم اسے واپس لے لو۔“ [صحیح ابن حبان/كتاب الهبة/حدیث: 5097]

سیدنا نعمان بن بشیر رضی اللہ عنہما بیان کرتے ہیں کہ میرے والد مجھے ساتھ لے کر نبی اکرم صلی اللہ علیہ وسلم کی خدمت میں تشریف لے گئے تاکہ نبی اکرم صلی اللہ علیہ وسلم کو اس عطیے کے بارے میں گواہ بنا لیں جو انہوں نے مجھے دیا تھا۔ نبی اکرم صلی اللہ علیہ وسلم نے دریافت کیا: ”کیا تمہاری اس کے علاوہ اور اولاد ہے؟“ انہوں نے جواب دیا: جی ہاں، نبی اکرم صلی اللہ علیہ وسلم نے فرمایا: ”پھر (عطیہ دینے میں) تم ان کے درمیان برابری رکھو۔“ [صحیح ابن حبان/كتاب الهبة/حدیث: 5098]

سیدنا نعمان بن بشیر رضی اللہ عنہما نے خطبہ دیتے ہوئے یہ بات بیان کی: میرے والد مجھے ساتھ لے کر نبی اکرم صلی اللہ علیہ وسلم کی خدمت میں گئے تاکہ وہ نبی اکرم صلی اللہ علیہ وسلم کو اس عطیے کے بارے میں گواہ بنا لیں جو انہوں نے مجھے دیا تھا۔ نبی اکرم صلی اللہ علیہ وسلم نے دریافت کیا: ”کیا تمہارے اس کے علاوہ اور بھی بیٹے ہیں؟“ انہوں نے جواب دیا: جی ہاں۔ نبی اکرم صلی اللہ علیہ وسلم نے فرمایا: ”پھر تم ان کے درمیان برابری کرو۔“ [صحیح ابن حبان/كتاب الهبة/حدیث: 5099]

سیدنا نعمان بن بشیر رضی اللہ عنہما بیان کرتے ہیں کہ ان کے والد انہیں ساتھ لے کر نبی اکرم صلی اللہ علیہ وسلم کی خدمت میں گئے، انہوں نے عرض کی: میں نے اپنے اس بیٹے کو اپنا غلام عطیے کے طور پر دیا ہے۔ نبی اکرم صلی اللہ علیہ وسلم نے دریافت فرمایا: ”کیا تم نے اپنی تمام اولاد کو اسی طرح عطیہ دیا ہے؟“ انہوں نے جواب دیا: جی نہیں۔ نبی اکرم صلی اللہ علیہ وسلم نے فرمایا: ”پھر تم اسے واپس لے لو۔“ [صحیح ابن حبان/كتاب الهبة/حدیث: 5100]

سیدنا جابر رضی اللہ عنہ بیان کرتے ہیں کہ سیدنا بشیر رضی اللہ عنہ کی اہلیہ نے کہا: آپ میرے اس بیٹے کو غلام عطیے کے طور پر دیں اور نبی اکرم صلی اللہ علیہ وسلم کو اس بارے میں گواہ بنا لیں، تو انہوں نے یعنی نبی اکرم صلی اللہ علیہ وسلم نے (سیدنا نعمان بن بشیر رضی اللہ عنہ کے والد سے) دریافت کیا: ”کیا اس کے اور بھی بھائی ہیں؟“ انہوں نے جواب دیا: جی ہاں، نبی اکرم صلی اللہ علیہ وسلم نے دریافت کیا: ”کیا تم نے ان میں سے ہر ایک کو اسی طرح عطیہ دیا ہے، جس طرح اسے دیا ہے؟“ انہوں نے عرض کی: جی نہیں۔ نبی اکرم صلی اللہ علیہ وسلم نے فرمایا: ”یہ درست نہیں ہے اور میں صرف حق بات پر گواہ بنتا ہوں۔“ [صحیح ابن حبان/كتاب الهبة/حدیث: 5101]

سیدنا نعمان بن بشیر رضی اللہ عنہما بیان کرتے ہیں کہ ان کے والد نے انہیں غلام عطیے کے طور پر دیا۔ نبی اکرم صلی اللہ علیہ وسلم نے دریافت فرمایا: ”یہ کس کا غلام ہے؟“ انہوں نے جواب دیا: یہ وہ غلام ہے جو میرے والد نے مجھے عطا کیا ہے، نبی اکرم صلی اللہ علیہ وسلم نے فرمایا: ”کیا انہوں نے تمہارے تمام بھائیوں کو اسی طرح عطا کیا ہے، جس طرح تمہیں عطا کیا ہے؟“ سیدنا نعمان رضی اللہ عنہ نے عرض کی: جی نہیں۔ نبی اکرم صلی اللہ علیہ وسلم نے فرمایا: ”پھر تم اسے واپس کر دو۔“ نبی اکرم صلی اللہ علیہ وسلم نے ان کے والد سے فرمایا: ”تم کسی زیادتی کے کام میں مجھے گواہ نہ بناؤ۔“ [صحیح ابن حبان/كتاب الهبة/حدیث: 5102]

سیدنا نعمان بن بشیر رضی اللہ عنہما بیان کرتے ہیں کہ میری والدہ نے میرے والد سے یہ گزارش کی کہ وہ اپنے مال میں سے کوئی چیز مجھے ہبہ کر دیں۔ وہ ایک سال تک اسے ملتوی کرتے رہے، پھر انہیں یہ مناسب لگا، انہوں نے وہ چیز مجھے ہبہ کر دی۔ میری والدہ نے یہ کہا: میں اس وقت تک راضی نہیں ہوں گی جب تک آپ نبی اکرم صلی اللہ علیہ وسلم کو اس بارے میں گواہ نہیں بنا لیتے، تو سیدنا بشیر رضی اللہ عنہ نے عرض کی: یا رسول اللہ صلی اللہ علیہ وسلم ! اس لڑکے کی والدہ جو رواحہ کی صاحب زادی ہے، وہ ایک سال سے مجھے یہ کہہ رہی تھیں کہ میں اپنے اس بیٹے کو کوئی چیز ہبہ کروں، اب مجھے مناسب لگا تو میں نے اسے ہبہ کر دیا۔ اس عورت کی یہ خواہش ہے یا رسول اللہ صلی اللہ علیہ وسلم ! آپ اس کے گواہ بن جائیں۔ نبی اکرم صلی اللہ علیہ وسلم نے دریافت فرمایا: ”اے بشیر! کیا تمہاری اس کے علاوہ اور اولاد بھی ہے؟“ انہوں نے جواب دیا: جی ہاں۔ نبی اکرم صلی اللہ علیہ وسلم نے فرمایا: ”پھر تم کسی زیادتی کے کام میں مجھے گواہ نہ بناؤ۔“ [صحیح ابن حبان/كتاب الهبة/حدیث: 5103]

سیدنا نعمان بن بشیر رضی اللہ عنہما بیان کرتے ہیں کہ (میری والدہ) عمرہ بنت رواحہ نے (میرے والد) سیدنا بشیر بن سعد رضی اللہ عنہ سے یہ کہا کہ وہ اپنے مال میں سے مجھے (یعنی سیدنا نعمان بن بشیر کو) کوئی عطیہ دیں، لیکن انہوں نے اس خاتون کی بات تسلیم نہیں کی۔ ایک یا دو سال گزرنے کے بعد انہیں یہ مناسب لگا تو انہوں نے مجھے ایک عطیہ دے دیا۔ انہوں نے اس خاتون سے کہا: تم نے جو میرے بیٹے کے بارے میں درخواست کی تھی اسے میں نے پورا نہیں کیا تھا، اب مجھے یہ مناسب لگا کہ میں اسے عطیہ دے دوں۔ اس خاتون نے کہا: جی نہیں، اللہ کی قسم! میں اس وقت تک راضی نہیں ہوں گی جب تک آپ اس کا ہاتھ پکڑ کر اسے ساتھ لے کر نبی اکرم صلی اللہ علیہ وسلم کے پاس نہیں جاتے اور نبی اکرم صلی اللہ علیہ وسلم کو اس بات کا گواہ نہیں بناتے۔ سیدنا نعمان بن بشیر رضی اللہ عنہما بیان کرتے ہیں: انہوں نے میرا ہاتھ پکڑا اور مجھے ساتھ لے کر نبی اکرم صلی اللہ علیہ وسلم کے پاس گئے اور آپ کو پورا واقعہ سنایا تو نبی اکرم صلی اللہ علیہ وسلم نے ان سے دریافت کیا: ”کیا تمہاری اس کے علاوہ اور اولاد بھی ہے؟“ انہوں نے جواب دیا: جی ہاں، نبی اکرم صلی اللہ علیہ وسلم نے دریافت کیا: ”جس طرح تم نے اسے دیا ہے، اسی طرح ان میں سے ہر ایک کو بھی دیا ہے؟“ انہوں نے عرض کی: جی نہیں، نبی اکرم صلی اللہ علیہ وسلم نے فرمایا: ”پھر میں اس بات کا گواہ نہیں بنتا، یہ زیادتی ہے، تم میرے علاوہ کسی اور کو گواہ بنا لو، تم لوگ اپنی اولاد کے درمیان عطیات کے حوالے سے انصاف سے کام لو، جس طرح تم لوگ اس بات کو پسند کرتے ہو کہ وہ نیکی اور بھلائی کے حوالے سے تمہارے ساتھ انصاف سے کام لیں۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”میرے علاوہ کسی اور کو گواہ بنا لو۔“ اس کے ذریعے اس بات کی اطلاع دینا مراد ہے کہ اگر وہ یہ فعل کر لیتے ہیں، تو اس پر عمل کرنا جائز نہیں ہو گا، تو نبی اکرم صلی اللہ علیہ وسلم نے اس چیز کی ممانعت اس کے متضاد کا حکم دینے کے الفاظ کے ذریعے کی ہے، جس طرح نبی اکرم صلی اللہ علیہ وسلم نے سیدہ عائشہ رضی اللہ عنہا سے فرمایا تھا: ”تم (ولاء) کی شرط ان کے لیے رہنے دو کیونکہ ولاء کا حق آزاد کرنے والے کو ملتا ہے۔“ [صحیح ابن حبان/كتاب الهبة/حدیث: 5104]

سیدنا نعمان بن بشیر رضی اللہ عنہما بیان کرتے ہیں کہ نبی اکرم صلی اللہ علیہ وسلم سیدنا بشیر بن سعد رضی اللہ عنہ کے پاس تشریف لائے تو انہوں نے عرض کی: یا رسول اللہ صلی اللہ علیہ وسلم ! (میری بیوی) عمرہ بنت رواحہ رضی اللہ عنہا نے یہ ارادہ کیا کہ میں اس کے بیٹے کو کوئی چیز عطیے کے طور پر دوں، اس نے مجھے کہا کہ میں آپ کو اس بات پر گواہ بنا لوں۔ نبی اکرم صلی اللہ علیہ وسلم نے ان سے فرمایا: ”کیا تمہارے اس کے علاوہ اور بھی بچے ہیں؟“ انہوں نے عرض کی: جی ہاں۔ نبی اکرم صلی اللہ علیہ وسلم نے فرمایا: ”کیا تم نے ان سب کو عطیہ دیا ہے، جس طرح تم نے اسے عطیہ دیا ہے؟“ اس نے عرض کی: جی نہیں، تو نبی اکرم صلی اللہ علیہ وسلم نے فرمایا: ”پھر تم زیادتی کے کام میں مجھے گواہ نہ بناؤ۔“ [صحیح ابن حبان/كتاب الهبة/حدیث: 5105]

سیدنا نعمان بن بشیر رضی اللہ عنہما بیان کرتے ہیں: میرے والد نے مجھے فلاں، فلاں چیز عطیے کے طور پر دی، وہ مجھے ساتھ لے کر نبی اکرم صلی اللہ علیہ وسلم کی خدمت میں آئے تاکہ نبی اکرم صلی اللہ علیہ وسلم کو اس بارے میں گواہ بنا لیں، نبی اکرم صلی اللہ علیہ وسلم نے دریافت کیا: ”کیا تم نے اپنی تمام اولاد کو اسی طرح عطیہ دیا ہے جس طرح اسے دیا ہے؟“ انہوں نے عرض کی: جی نہیں، نبی اکرم صلی اللہ علیہ وسلم نے فرمایا: ”میری بجائے کسی اور کو گواہ بنا لو، یہ ظلم ہے“، پھر نبی اکرم صلی اللہ علیہ وسلم نے فرمایا: ”کیا تم اس بات کو پسند کرتے ہو کہ تمہاری تمام اولاد تمہارے ساتھ نیکی کرنے میں برابر ہو؟“ انہوں نے جواب دیا: جی ہاں، نبی اکرم صلی اللہ علیہ وسلم نے فرمایا: ”پھر یہ درست نہیں ہے۔“ [صحیح ابن حبان/كتاب الهبة/حدیث: 5106]