سیدنا جابر بن عبداللہ رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص بنجر زمین کو آباد کرتا ہے اسے اس کا اجر ملے گا اور اس میں سے جو بھی کچھ کھا لیتا ہے، تو یہ چیز اس آدمی کے لیے صدقہ ہو گی۔“ [صحیح ابن حبان/كتاب إحياء الموات/حدیث: 5202]

سیدنا جابر بن عبداللہ رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جو شخص بنجر زمین کو آباد کرتا ہے اسے اس کا اجر ملے گا، اس میں سے جو بھی جاندار چیز کچھ کھا لیتی ہے اسے اس کا اجر ملے گا۔“ [صحیح ابن حبان/كتاب إحياء الموات/حدیث: 5203]

سیدنا جابر بن عبداللہ رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص بنجر زمین کو آباد کرتا ہے اسے اس کا اجر ملے گا اور اس میں سے جو چیز بھی کچھ کھا لیتی ہے تو یہ اس شخص کے حق میں صدقہ شمار ہو گا۔“ (امام ابن حبان رحمہ اللہ فرماتے ہیں:) اس روایت میں اس بات کی صحیح دلیل موجود ہے جب کوئی ذمی شخص کسی بنجر زمین کو آباد کرے تو وہ اس کی ملکیت نہیں ہو گی کیونکہ صدقہ صرف مسلمان کے لیے ہوتا ہے۔ [صحیح ابن حبان/كتاب إحياء الموات/حدیث: 5204]

سیدنا جابر بن عبداللہ رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص بنجر زمین کو آباد کرتا ہے وہ اس کی ملکیت ہوتی ہے، اس میں سے جو بھی جانور وغیرہ جو کچھ کھا لیتا ہے یہ چیز اس کے لیے صدقہ ہوگی۔“ (امام ابن حبان رحمہ اللہ فرماتے ہیں:) جب نبی اکرم صلی اللہ علیہ وسلم نے اس روایت میں یہ فرما دیا: ”اس میں سے جو بھی جانور وغیرہ کچھ کھا لیتا ہے تو یہ اس کے حق میں صدقہ ہوگا“ تو اس میں اس بات کا واضح بیان موجود ہے کہ اس روایت میں موجود حکم مسلمانوں کے لیے ہے دوسروں کے لیے نہیں ہے، اور اس روایت کا حکم ذمیوں پر لاگو نہیں ہوگا کہ اگر وہ کسی بنجر زمین کو آباد کر لیتے ہیں تو وہ ان کی ملکیت نہیں ہوگی کیونکہ صدقہ صرف مسلمانوں کی طرف سے ہوتا ہے۔ ہشام بن عروہ نے یہ روایت وہب بن کیسان سے سنی ہے اور عبداللہ بن عبدالرحمن کے حوالے سے سیدنا جابر بن عبداللہ رضی اللہ عنہما سے سنی ہے، اس کے دونوں طرق محفوظ ہیں۔ رزق کے طلب گاروں کے لیے لفظ «عَافِيَة» استعمال ہوتا ہے (جو اس حدیث میں استعمال ہوا ہے) یہ بات امام ابوحاتم رحمہ اللہ نے بیان کی ہے۔ [صحیح ابن حبان/كتاب إحياء الموات/حدیث: 5205]