حضرت قیس بن مسلم سے روایت ہے کہ میں نے حضرت حسن بن محمد سے اللہ تعالیٰ کے فرمان ﴿وَاعْلَمُوا أَنَّمَا غَنِمْتُمْ مِنْ شَيْءٍ فَأَنَّ لِلَّهِ خُمُسَهُ﴾ [سورة الأنفال: 41] ”جان لو کہ تم جو بھی غنیمت حاصل کرو، اس کا خمس اللہ تعالیٰ کے لیے ہے۔“ کے (مفہوم کے) بارے میں پوچھا۔ انہوں نے فرمایا: یہ اللہ تعالیٰ کا آغازِ کلام کا انداز ہے ورنہ دنیا اور آخرت سب اللہ تعالیٰ ہی کے لیے ہیں، البتہ رسول اللہ صلی اللہ علیہ وسلم کی وفات کے بعد آپ اور قرابت داروں کے دو حصوں میں لوگوں نے اختلاف کیا۔ بعض نے کہا کہ آپ کے بعد آپ کا حصہ خلیفہ اور حاکمِ وقت کے لیے ہو گا۔ اسی طرح بعض نے کہا کہ رشتے داروں کا حصہ اب بھی رسول اللہ صلی اللہ علیہ وسلم کے اہل بیت کے لیے ہے۔ اور بعض نے کہا: اب رشتے داروں کا حصہ خلیفۂ وقت کے رشتے داروں کے لیے ہو گا، پھر بالآخر انہوں نے اس بات پر اتفاق کر لیا کہ یہ دونوں حصے جہاد کے لیے گھوڑے اور اسلحہ خریدنے میں خرچ کیے جائیں، چنانچہ حضرت ابوبکر اور حضرت عمر رضی اللہ عنہما کے دورِ خلافت میں یہ دونوں حصے اسی مصرف میں خرچ ہوتے رہے۔ [سنن نسائي/كتاب قسم الفىء/حدیث: 4148]

موسیٰ بن ابو عائشہ سے روایت ہے کہ میں نے یحییٰ بن جزار سے اس آیت ﴿وَاعْلَمُوا أَنَّمَا غَنِمْتُمْ مِنْ شَيْءٍ فَأَنَّ لِلَّهِ خُمُسَهُ وَلِلرَّسُولِ﴾ [سورة الأنفال: 41] ”تم جان لو کہ جو بھی تم غنیمت حاصل کرو، اس کا پانچواں حصہ اللہ تعالیٰ اور اس کے رسول صلی اللہ علیہ وسلم کے لیے ہے۔“ کے (مفہوم کے) بارے میں پوچھا۔ میں نے کہا کہ نبیٔ اکرم صلی اللہ علیہ وسلم کا خمس میں کتنا حصہ تھا؟ انہوں نے کہا: خمس کا پانچواں حصہ۔ [سنن نسائي/كتاب قسم الفىء/حدیث: 4149]

حضرت مطرف رحمہ اللہ سے منقول ہے کہ حضرت شعبی رحمہ اللہ سے نبی اکرم صلی اللہ علیہ وسلم کے حصے اور آپ کے «الصَّفِيُّ» (خاص حصے) کے بارے میں پوچھا گیا تو انہوں نے کہا: نبی صلی اللہ علیہ وسلم کا (عام) حصہ تو ایک عام مسلمان آدمی کے حصے کے برابر تھا، البتہ صفی (خصوصی حصے) کے بارے میں آپ کو اختیار تھا کہ جو بھی پسندیدہ اور نفیس چیز آپ پسند فرماتے، لے سکتے تھے۔ [سنن نسائي/كتاب قسم الفىء/حدیث: 4150]

حضرت یزید بن شخیر رحمہ اللہ سے مروی ہے کہ میں (بصرہ کے محلہ) مربد میں حضرت مطرف رحمہ اللہ کے ساتھ تھا کہ ایک آدمی آیا۔ اس کے پاس سرخ چمڑے کا ایک ٹکڑا تھا۔ اس نے کہا: یہ مجھے رسول اللہ صلی اللہ علیہ وسلم نے لکھ کر دیا تھا۔ تم میں سے کوئی پڑھ سکتا ہے؟ میں نے کہا: میں پڑھ دیتا ہوں۔ اس میں لکھا تھا: ”یہ دستاویز نبی اکرم حضرت محمد مصطفی صلی اللہ علیہ وسلم کی طرف سے بنو زہیر بن اقیش کے لیے لکھی گئی ہے کہ اگر وہ «لَا إِلٰهَ إِلَّا اللّٰهُ مُحَمَّدٌ رَّسُولُ اللّٰهِ» ”اللہ کے سوا کوئی معبود نہیں، محمد اللہ کے رسول ہیں“ کی گواہی دیں، مشرکین سے الگ تھلگ ہو جائیں اور اپنی حاصل کردہ غنیمتوں میں سے خمس (حکومت کو) دینے کا اقرار کریں، نیز وہ نبی صلی اللہ علیہ وسلم کا عام حصہ اور خصوصی حصہ (صفی) بھی ادا کریں تو (وہ بے خوف ہو کر رہیں)۔ ان کو اللہ اور اس کے رسول صلی اللہ علیہ وسلم کی طرف سے پروانۂ امن حاصل ہو گا۔“ [سنن نسائي/كتاب قسم الفىء/حدیث: 4151]

حضرت مجاہد رحمہ اللہ بیان کرتے ہیں کہ وہ خمس جو اللہ تعالیٰ کے لیے اور ان کے رسول کے لیے تھا، وہ نبی اکرم صلی اللہ علیہ وسلم اور آپ کے رشتے داروں کے لیے تھا کیونکہ وہ صدقہ نہیں لیتے تھے، لہٰذا خمس کا پانچواں حصہ نبی اکرم صلی اللہ علیہ وسلم کے لیے تھا اور خمس کا ایک اور پانچواں حصہ آپ کے رشتہ داروں کے لیے تھا۔ یتیموں کے لیے بھی اسی قدر (پانچواں حصہ) تھا۔ مساکین کے لیے بھی (پانچواں حصہ) تھا۔ اور مسافروں کے لیے بھی پانچواں حصہ تھا۔ ابو عبدالرحمن (امام نسائی رحمہ اللہ) بیان کرتے ہیں کہ اللہ تعالیٰ نے فرمایا: ﴿وَاعْلَمُوا أَنَّمَا غَنِمْتُمْ مِنْ شَيْءٍ فَأَنَّ لِلَّهِ خُمُسَهُ وَلِلرَّسُولِ وَلِذِي الْقُرْبَى وَالْيَتَامَى وَالْمَسَاكِينِ وَابْنِ السَّبِيلِ﴾ [سورة الأنفال: 41] ”تم جان لو کہ جو بھی تم غنیمت حاصل کرو، اس کا پانچواں حصہ اللہ تعالیٰ، اس کے رسول صلی اللہ علیہ وسلم ، آپ کے رشتے داروں، یتیموں، مسکینوں اور مسافروں کے لیے ہے۔“ اللہ تعالیٰ کا فرمانا «لِلّٰهِ» ”اللہ کے لیے“ یہ تو آغازِ کلام (تبرک) کے لیے ہے، کیونکہ سب چیزیں اللہ تعالیٰ ہی کی ہیں۔ ممکن ہے اللہ تعالیٰ نے غنیمت اور خمس کے مسئلے میں اپنا ذکر پہلے اس لیے فرمایا ہو کہ یہ انتہائی عمدہ کمائی ہے۔ اللہ تعالیٰ نے صدقے کی نسبت اپنی طرف نہیں فرمائی کیونکہ یہ لوگوں کا میل کچیل ہے۔ یہ بھی کہا گیا ہے کہ غنیمت سے کچھ مال لے کر بیت اللہ پر صرف کیا جائے گا اور یہ اللہ تعالیٰ والا حصہ ہے۔ اور نبی اکرم صلی اللہ علیہ وسلم کا حصہ اب امامِ وقت، یعنی حاکمِ اعلیٰ کو ملے گا۔ وہ اس سے گھوڑے اور اسلحہ وغیرہ خریدے گا اور جن کو وہ مناسب سمجھے، ان کو اس میں سے عطیات دے گا، مثلاً: جن لوگوں نے مسلمانوں کے لیے کوئی کارنامے سرانجام دیے ہوں اور جن سے مسلمانوں کا فائدہ ہو، محدثین، فقہاء، حفاظ اور دیگر اہل علم وغیرہ (بھی اس میں شامل ہیں)۔ ”قرابت داری“ کا حصہ بنو ہاشم اور بنو مطلب میں تقسیم ہوگا، خواہ وہ مالدار ہوں یا فقیر۔ یہ بھی کہا گیا ہے کہ ان میں صرف فقراء کو ملے گا، اغنیاء کو نہیں، جیسے یتیموں اور مسافروں میں سے صرف فقراء کو ملتا ہے اور میرے نزدیک یہ قول زیادہ درست ہے، «وَاللہُ أَعْلَمُ» ”اور اللہ بہتر جانتا ہے“۔ چھوٹے بڑے، مرد اور عورت سب اس میں برابر ہوں گے کیونکہ اللہ تعالیٰ نے یہ حصہ ان کے لیے مقرر فرما دیا ہے اور رسول اللہ صلی اللہ علیہ وسلم نے ان میں تقسیم فرمایا۔ کسی حدیث میں یہ ذکر نہیں کہ آپ نے ان میں سے کسی کو دوسرے سے زیادہ دیا ہو۔ (اس کی دلیل یہ ہے کہ) اگر کوئی شخص کسی خاندان کے لیے اپنی متروکہ جائیداد کے تیسرے حصے کی وصیت کر جائے تو علماء میں کوئی اختلاف نہیں کہ وہ ان کے درمیان برابر تقسیم ہو گا۔ مذکر و مؤنث گنتی کے وقت ایک سے ہوں گے (یعنی کم و بیش نہیں دیا جائے گا)۔ اسی طرح جو بھی چیز کسی قبیلے کو دی جائے، وہ ان میں برابر تقسیم ہوتی ہے الا یہ کہ وضاحت کر دی جائے اور اللہ تعالیٰ ہی توفیق دینے والا ہے۔ اور یتیموں، مسکینوں اور مسافروں کے حصے ان میں سے مسلمانوں کو ملیں گے (کافروں کو نہیں) اور ان میں سے کسی کو دو حصے نہیں دیے جائیں گے، مثلاً: مسکین کا بھی مسافر کا بھی (بلکہ ایک حصہ دیا جائے گا) اسے کہا جائے گا کہ ان میں سے جون سا چاہو لے لو۔ اور باقی چار حصے (یعنی خمس کے علاوہ غنیمت) امامِ وقت (حاکمِ اعلیٰ یا اس کا نمائندہ) جنگ میں حاضر ہونے والے بالغ مسلمانوں میں تقسیم کر دے گا۔ [سنن نسائي/كتاب قسم الفىء/حدیث: 4152]

حضرت مالک بن اوس بن حدثان رضی اللہ عنہ سے روایت ہے کہ حضرت علی اور حضرت عباس رضی اللہ عنہما حضرت عمر رضی اللہ عنہ کے پاس جھگڑتے ہوئے آئے۔ حضرت عباس رضی اللہ عنہ نے فرمایا: میرے اور اس (حضرت علی رضی اللہ عنہ) کے درمیان فیصلہ فرمایئے! حاضرین نے بھی کہا: ان کے درمیان ضرور فیصلہ فرمایئے۔ حضرت عمر رضی اللہ عنہ نے فرمایا: لیکن میں ان کے درمیان فیصلہ نہیں کروں گا جبکہ انہیں علم ہے کہ رسول اللہ صلی اللہ علیہ وسلم نے فرمایا: ”ہماری وراثت تقسیم نہیں ہوتی، جو کچھ ہم چھوڑ جائیں، وہ صدقہ ہوتا ہے۔“ رسول اللہ صلی اللہ علیہ وسلم ان (متنازعہ) زمینوں کے سرپرست اور متولی تھے۔ آپ صلی اللہ علیہ وسلم ان سے اپنے اہل بیت کی خوراک لیتے اور باقی آمدن بیت المال میں رکھتے تھے۔ پھر حضرت ابوبکر رضی اللہ عنہ آپ صلی اللہ علیہ وسلم کے بعد ان کے سرپرست اور متولی بنے، پھر حضرت ابوبکر رضی اللہ عنہ کے بعد میں ان کا سرپرست اور متولی بنا اور میں نے ان میں وہی کچھ کیا جو کچھ وہ کیا کرتے تھے، پھر یہ دونوں (حضرات علی و عباس رضی اللہ عنہما) میرے پاس آئے اور مجھ سے مطالبہ کیا کہ یہ زمین ان کے سپرد کی جائے اس شرط پر کہ وہ اسی طریقے سے اس کا انتظام کریں گے جس طرح رسول اللہ صلی اللہ علیہ وسلم کرتے تھے، حضرت ابوبکر رضی اللہ عنہ کرتے تھے اور میں کرتا رہا ہوں۔ میں نے اس شرط پر ان کو زمین دے دی اور ان سے عہد و پیمان لے لیا۔ پھر یہ دوبارہ میرے پاس آئے۔ یہ (حضرت عباس رضی اللہ عنہ) کہتے تھے کہ اتنی زمین میرے انتظام میں دے دیجیے جو مجھے میرے بھتیجے (رسول اللہ صلی اللہ علیہ وسلم ) سے بطور وراثت ملتی، اور یہ (حضرت علی رضی اللہ عنہ) کہتے تھے کہ اتنی زمین میرے انتظام میں دے دیجیے جو میری بیوی (حضرت فاطمہ رضی اللہ عنہا) کو وراثت میں ملتی۔ اگر تو یہ چاہیں کہ میں ان کو اس شرط پر زمین سپرد کر دوں کہ وہ اس میں اس طرح انتظام کریں جس طرح رسول اللہ صلی اللہ علیہ وسلم کرتے تھے، حضرت ابوبکر رضی اللہ عنہ کرتے تھے اور میں کرتا رہا ہوں، پھر تو میں اس شرط پر زمین ان کے سپرد کرتا ہوں، ورنہ میں انتظام سنبھال لیتا ہوں۔ پھر آپ نے یہ آیت پڑھی: ﴿وَاعْلَمُوا أَنَّمَا غَنِمْتُمْ مِنْ شَيْءٍ فَأَنَّ لِلَّهِ خُمُسَهُ وَلِلرَّسُولِ وَلِذِي الْقُرْبَى وَالْيَتَامَى وَالْمَسَاكِينِ وَابْنِ السَّبِيلِ﴾ [سورة الأنفال: 41] ”تم جان لو کہ جو بھی تم غنیمت حاصل کرو، اس کا پانچواں حصہ اللہ تعالیٰ، رسول اللہ صلی اللہ علیہ وسلم ، رشتے داروں (اہل بیت)، یتیموں، مسکینوں اور مسافروں کے لیے ہے۔“ خمس تو ان کے لیے ہو گیا۔ ﴿إِنَّمَا الصَّدَقَاتُ لِلْفُقَرَاءِ وَالْمَسَاكِينِ وَالْعَامِلِينَ عَلَيْهَا وَالْمُؤَلَّفَةِ قُلُوبُهُمْ وَفِي الرِّقَابِ وَالْغَارِمِينَ وَفِي سَبِيلِ اللَّهِ وَابْنِ السَّبِيلِ﴾ [سورة التوبة: 60] ”بلاشبہ صدقات فقراء، مساکین، صدقات جمع کرنے والے ملازمین، مؤلفۃ القلوب، غلاموں، مقروضوں اور مجاہدین کے لیے ہیں۔“ یہ (صدقات) ان کے لیے ہو گئے۔ ﴿وَمَا أَفَاءَ اللَّهُ عَلَى رَسُولِهِ مِنْهُمْ فَمَا أَوْجَفْتُمْ عَلَيْهِ مِنْ خَيْلٍ وَلَا رِكَابٍ﴾ [سورة الحشر: 6] ”اور جو مالِ غنیمت اللہ تعالیٰ نے اپنے رسولِ کریم صلی اللہ علیہ وسلم کو ان (بنونضیر) سے عطا فرمایا ہے، اس کے لیے تم نے نہ گھوڑے دوڑائے نہ اونٹ۔“ حضرت زہری بیان کرتے ہیں کہ یہ زمینیں خالص رسول اللہ صلی اللہ علیہ وسلم کے لیے تھیں۔ اسی طرح کچھ عربی بستیاں جیسے فدک وغیرہ بھی آپ صلی اللہ علیہ وسلم کے لیے خاص تھیں۔ ﴿مَا أَفَاءَ اللَّهُ عَلَى رَسُولِهِ مِنْ أَهْلِ الْقُرَى فَلِلَّهِ وَلِلرَّسُولِ وَلِذِي الْقُرْبَى وَالْيَتَامَى وَالْمَسَاكِينِ وَابْنِ السَّبِيلِ﴾ [سورة الحشر: 7] ”جو کچھ اللہ تعالیٰ نے اپنے رسولِ کریم صلی اللہ علیہ وسلم کو ان بستیوں سے دیا ہے، وہ اللہ تعالیٰ، اس کے رسول صلی اللہ علیہ وسلم ، اہل بیت، یتیموں، مسکینوں اور مسافروں کے لیے ہے۔“ نیز ﴿لِلْفُقَرَاءِ الْمُهَاجِرِينَ الَّذِينَ أُخْرِجُوا مِنْ دِيَارِهِمْ وَأَمْوَالِهِمْ﴾ [سورة الحشر: 8] ”یہ ان فقراءِ مہاجرین کے لیے ہے جن کو ان کے گھر بار سے نکال دیا گیا“ اور ﴿وَالَّذِينَ تَبَوَّءُوا الدَّارَ وَالْإِيمَانَ مِنْ قَبْلِهِمْ﴾ [سورة الحشر: 9] ”ان انصار کے لیے جو دار الاسلام (مدینہ منورہ) کے رہنے والے ہیں اور مہاجرین کی آمد سے قبل ہی مسلمان ہو چکے تھے“ اور ﴿وَالَّذِينَ جَاءُوا مِنْ بَعْدِهِمْ﴾ [سورة الحشر: 10] ”ان لوگوں کے لیے بھی جو ان کے بعد آئے (یا آئیں گے)۔“ یہ آیت تمام مسلمانوں کو شامل ہے، کسی مسلمان کو بھی باہر نہیں رہنے دیا، سب کا اس مال میں حق ہے، البتہ وہ غلام جو تمہاری ملکیت میں ہیں (ان کا کوئی حق نہیں)۔ اور اگر میں زندہ رہا تو ان شاء اللہ ہر مسلمان کو اس کا حق لازماً مل کے رہے گا۔ [سنن نسائي/كتاب قسم الفىء/حدیث: 4153]