حضرت عائشہ رضی اللہ عنہا زوجہ نبی صلی اللہ علیہ وسلم سے روایت ہے کہ نبی صلی اللہ علیہ وسلم جب غسلِ جنابت فرماتے تو پہلے دونوں ہاتھ دھوتے، پھر نماز کے وضو کی طرح وضو کرتے، بعد ازاں اپنی انگلیاں پانی میں ڈال کر بالوں کی جڑوں کا خلال کرتے، پھر دونوں ہاتھوں سے تین چلو لے کر اپنے سر پر ڈالتے، اس کے بعد اپنے تمام جسم پر پانی بہاتے۔ [صحيح البخاري/كتاب الغسل/حدیث: 248]

حضرت میمونہ رضی اللہ عنہا زوجہ نبی صلی اللہ علیہ وسلم سے روایت ہے، انہوں نے فرمایا: رسول اللہ صلی اللہ علیہ وسلم نے (غسل کے وقت) اس طرح وضو فرمایا جس طرح نماز کے لیے کیا جاتا ہے، لیکن پاؤں نہیں دھوئے، البتہ اپنی شرمگاہ کو اور جسم پر لگی ہوئی آلائش کو دھویا۔ پھر اپنے اوپر پانی بہایا، اس کے بعد جائے غسل سے الگ ہو کر اپنے دونوں پاؤں دھوئے۔ یہ آپ صلی اللہ علیہ وسلم کا غسل جنابت تھا۔ [صحيح البخاري/كتاب الغسل/حدیث: 249]

حضرت عائشہ رضی اللہ عنہا سے روایت ہے، انہوں نے فرمایا: میں اور نبی صلی اللہ علیہ وسلم ایک ہی برتن سے غسل کرتے تھے۔ وہ برتن ایک بڑا پیالہ تھا جسے «فَرَق» کہا جاتا ہے۔ [صحيح البخاري/كتاب الغسل/حدیث: 250]

حضرت ابوسلمہ رحمہ اللہ سے روایت ہے، فرماتے ہیں: میں اور حضرت عائشہ رضی اللہ عنہا کے بھائی حضرت عائشہ رضی اللہ عنہا کی خدمت میں حاضر ہوئے، ان کے بھائی نے نبی صلی اللہ علیہ وسلم کے غسل کے متعلق دریافت کیا تو انہوں نے صاع جیسا ایک برتن منگوایا، پھر غسل کیا اور اسے اپنے سر پر بہایا، اس وقت ہمارے اور ان کے درمیان پردہ حائل تھا۔ ابوعبداللہ (امام بخاری رحمہ اللہ) کہتے ہیں کہ یزید بن ہارون، بہز (بن اسعد) اور (عبدالملک بن ابراہیم) جدی نے حضرت شعبہ رحمہ اللہ سے قدرِ صاع کے الفاظ بیان کیے ہیں۔ [صحيح البخاري/كتاب الغسل/حدیث: 251]

حضرت ابوجعفر رحمہ اللہ سے روایت ہے کہ وہ اور ان کے والد گرامی، حضرت جابر بن عبداللہ رضی اللہ عنہما کے پاس تھے، جبکہ ان کے ہاں اور لوگ بھی تھے۔ انہوں نے حضرت جابر رضی اللہ عنہما سے غسل کے متعلق سوال کیا تو انہوں نے جواب دیا: تجھے ایک صاع کافی ہے۔ اس پر انہی لوگوں میں سے کسی نے کہا: مجھے تو کافی نہیں ہے۔ حضرت جابر رضی اللہ عنہما نے فرمایا: اتنا پانی تو اس ذاتِ گرامی صلی اللہ علیہ وسلم کے لیے کافی ہوتا تھا جن کے بال بھی تجھ سے زیادہ تھے اور وہ خود بھی تجھ سے بہتر تھے۔ پھر حضرت جابر رضی اللہ عنہما نے ایک کپڑے میں ہماری امامت کرائی۔ [صحيح البخاري/كتاب الغسل/حدیث: 252]

عبداللہ بن عباس رضی اللہ عنہما سے روایت ہے کہ نبی صلی اللہ علیہ وسلم اور میمونہ رضی اللہ عنہا ایک ہی برتن سے غسل فرمایا کرتے تھے۔ ابوعبداللہ (امام بخاری رحمہ اللہ) نے کہا کہ ابن عیینہ رحمہ اللہ آخر عمر میں «عَنِ ابْنِ عَبَّاسٍ، عَنْ مَيْمُونَةَ» کہنے لگے تھے، لیکن صحیح الفاظ وہی ہیں جو ابونعیم رحمہ اللہ نے بیان کیے ہیں۔ [صحيح البخاري/كتاب الغسل/حدیث: 253]

حضرت جبیر بن مطعم رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم نے فرمایا: ”میں تو اپنے سر پر تین بار پانی بہاتا ہوں۔“ اور (یہ کہہ کر) آپ نے اپنے دونوں ہاتھوں سے اشارہ فرمایا۔ [صحيح البخاري/كتاب الغسل/حدیث: 254]

حضرت جابر بن عبداللہ رضی اللہ عنہما سے روایت ہے، انہوں نے فرمایا: رسول اللہ صلی اللہ علیہ وسلم اپنے سر پر تین بار پانی بہایا کرتے تھے۔ [صحيح البخاري/كتاب الغسل/حدیث: 255]

حضرت ابوجعفر رضی اللہ عنہ کا بیان ہے کہ ہم سے حضرت جابر بن عبداللہ رضی اللہ عنہما نے فرمایا: میرے پاس تمہارے چچا زاد آئے تھے، ان کا اشارہ حسن بن محمد ابن حنفیہ کی طرف تھا، انہوں نے پوچھا: غسل جنابت کا کیا طریقہ ہے؟ میں نے کہا: نبی صلی اللہ علیہ وسلم تین چلو لیتے اور انہیں اپنے سر پر بہاتے تھے، پھر اپنے تمام بدن پر پانی ڈالتے تھے۔ حسن نے کہا: میں تو بہت بالوں والا شخص ہوں۔ میں نے جواب دیا: نبی صلی اللہ علیہ وسلم کے بال تم سے زیادہ تھے۔ [صحيح البخاري/كتاب الغسل/حدیث: 256]

حضرت عبداللہ بن عباس رضی اللہ عنہما سے روایت ہے، انہوں نے کہا کہ حضرت میمونہ رضی اللہ عنہا نے فرمایا: میں نے ایک مرتبہ نبی صلی اللہ علیہ وسلم کے غسل کے لیے پانی رکھا، آپ صلی اللہ علیہ وسلم نے اپنا ہاتھ دو یا تین مرتبہ دھویا، پھر آپ صلی اللہ علیہ وسلم نے اپنے بائیں ہاتھ پر پانی ڈال کر اپنی شرمگاہ کو دھویا، پھر آپ صلی اللہ علیہ وسلم نے اپنا ہاتھ زمین پر رگڑا، بعد ازاں کلی کی اور ناک میں پانی چڑھایا، پھر چہرہ مبارک اور دونوں ہاتھوں کو دھویا، اس کے بعد آپ صلی اللہ علیہ وسلم نے اپنے جسم پر پانی بہایا، پھر اپنی جگہ سے ہٹ کر دونوں پاؤں دھوئے۔ [صحيح البخاري/كتاب الغسل/حدیث: 257]