حضرت طلحہ رحمہ اللہ سے روایت ہے، انہوں نے کہا کہ میں نے حضرت عبداللہ بن ابی اوفیٰ رضی اللہ عنہ سے پوچھا: ”کیا نبی صلی اللہ علیہ وسلم نے کوئی وصیت کی تھی؟“ انہوں نے فرمایا: ”نہیں۔“ میں نے کہا: ”پھر لوگوں پر وصیت کیونکر فرض کی گئی ہے یا لوگوں کو اس کا کیونکر حکم دیا گیا ہے؟“ انہوں نے کہا: ”آپ صلی اللہ علیہ وسلم نے اللہ کی کتاب پر عمل کرنے کا حکم دیا تھا۔“ [صحيح البخاري/كتاب المغازي/حدیث: 4460]

حضرت عمرو بن حارث رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم نے نہ دینار نہ درہم اور نہ کوئی لونڈی اور غلام چھوڑا، صرف ایک سفید خچر تھا جس پر آپ صلی اللہ علیہ وسلم سواری فرمایا کرتے تھے۔ اس کے علاوہ ہتھیار اور زمین چھوڑی تھی جسے آپ صلی اللہ علیہ وسلم نے مسافروں کے لیے صدقہ کر دیا تھا۔“ [صحيح البخاري/كتاب المغازي/حدیث: 4461]

حضرت انس رضی اللہ عنہ سے روایت ہے، انہوں نے کہا: جب نبی صلی اللہ علیہ وسلم سخت بیمار ہوئے اور آپ پر غشی طاری ہوئی تو حضرت فاطمہ رضی اللہ عنہا نے کہا: «وَا كَرْبَ أَبَتَاهُ» ”ہائے میرے والد کو سخت تکلیف ہے!“ آپ صلی اللہ علیہ وسلم نے فرمایا: «لَا كَرْبَ عَلَى أَبِيكِ بَعْدَ الْيَوْمِ» ”اے فاطمہ! آج کے بعد تمہارے والد کو کوئی تکلیف نہیں ہو گی۔“ پھر جب آپ صلی اللہ علیہ وسلم وفات پا گئے تو حضرت فاطمہ رضی اللہ عنہا نے فرمایا: «يَا أَبَتَاهُ أَجَابَ رَبًّا دَعَاهُ، يَا أَبَتَاهُ مَنْ جَنَّةُ الْفِرْدَوْسِ مَأْوَاهُ، يَا أَبَتَاهُ إِلَى جِبْرِيلَ نَنْعَاهُ» ”اے میرے ابا جان! جس نے اپنے رب کی دعوت کو قبول کر لیا۔ اے میرے ابوجان! جنت الفردوس آپ کا ٹھکانا ہے۔ اے والد گرامی! ہم حضرت جبرئیل علیہ السلام کو آپ کے انتقال کی خبر دیتے ہیں۔“ پھر جب آپ صلی اللہ علیہ وسلم کو دفن کر دیا گیا تو حضرت فاطمہ رضی اللہ عنہا نے حضرت انس رضی اللہ عنہ سے فرمایا: «يَا أَنَسُ أَطَابَتْ أَنْفُسُكُمْ أَنْ تَحْثُوا عَلَى رَسُولِ اللهِ صلی اللہ علیہ وسلم التُّرَابَ؟» ”اے انس! تمہارے دل رسول اللہ صلی اللہ علیہ وسلم پر مٹی ڈالنے کے لیے کیونکر آمادہ ہوئے تھے؟“ [صحيح البخاري/كتاب المغازي/حدیث: 4462]

حضرت عائشہ رضی اللہ عنہا سے روایت ہے، انہوں نے کہا کہ نبی صلی اللہ علیہ وسلم تندرستی کی حالت میں فرمایا کرتے تھے: ”کوئی نبی فوت نہیں ہوتا حتیٰ کہ وہ اپنی جگہ جنت میں دیکھ لیتا ہے، پھر اسے اختیار دیا جاتا ہے۔“ چنانچہ جب آپ صلی اللہ علیہ وسلم کی وفات قریب ہوئی اور آپ کا سر مبارک میری ران پر تھا تو آپ پر غشی طاری ہو گئی۔ پھر افاقہ ہوا تو آپ نے گھر کی چھت کی طرف نظر جما دی، پھر آپ نے فرمایا: «اللَّهُمَّ الرَّفِيقَ الْأَعْلَى» ”اے اللہ! میں رفیقِ اعلیٰ کا طلبگار ہوں۔“ میں نے کہا: اب آپ ہمیں اختیار نہیں کریں گے، اور مجھے محسوس ہوا کہ یہ وہی کلام ہے جو آپ ہم سے تندرستی کی حالت میں بیان فرمایا کرتے تھے۔ حضرت عائشہ رضی اللہ عنہا نے فرمایا: آپ صلی اللہ علیہ وسلم کا آخری کلام جو آپ کی زبان سے نکلا وہ یہ تھا: «اللَّهُمَّ الرَّفِيقَ الْأَعْلَى» ”اے اللہ! میں اپنے رفیقِ اعلیٰ کو اختیار کرتا ہوں۔“ [صحيح البخاري/كتاب المغازي/حدیث: 4463]

حضرت عائشہ رضی اللہ عنہا اور حضرت ابن عباس رضی اللہ عنہما سے روایت ہے کہ ”نبی صلی اللہ علیہ وسلم مکہ مکرمہ میں دس سال اقامت پذیر رہے، آپ پر قرآن مجید نازل ہوتا رہا اور دس سال مدینہ طیبہ میں قیام فرمایا۔“ [صحيح البخاري/كتاب المغازي/حدیث: 4464]

حضرت عائشہ رضی اللہ عنہا اور حضرت ابن عباس رضی اللہ عنہما سے روایت ہے کہ: ”نبی صلی اللہ علیہ وسلم مکہ مکرمہ میں دس سال اقامت پذیر رہے، آپ پر قرآن مجید نازل ہوتا رہا اور دس سال مدینہ طیبہ میں قیام فرمایا۔“ [صحيح البخاري/كتاب المغازي/حدیث: 4465]

حضرت عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم نے تریسٹھ (63) برس کی عمر میں انتقال فرمایا۔“ ابن شہاب نے کہا: ”مجھے سعید بن مسیب نے اسی طرح کی روایت بیان کی۔“ [صحيح البخاري/كتاب المغازي/حدیث: 4466]

حضرت عائشہ رضی اللہ عنہا سے روایت ہے، انہوں نے فرمایا: ”نبی صلی اللہ علیہ وسلم نے وفات پائی تو آپ کی زرہ ایک یہودی کے پاس تیس (30) صاع جو کے عوض گروی رکھی ہوئی تھی۔“ [صحيح البخاري/كتاب المغازي/حدیث: 4467]

حضرت عبداللہ بن عمر رضی اللہ عنہ سے روایت ہے کہ نبی صلی اللہ علیہ وسلم نے حضرت اسامہ رضی اللہ عنہ کو امیرِ لشکر مقرر کیا تو کچھ لوگوں نے ان کی امارت پر اعتراض کیا۔ نبی صلی اللہ علیہ وسلم نے فرمایا: ”جو کچھ تم نے اسامہ کے بارے میں کہا ہے وہ سب مجھ تک پہنچ چکا ہے اور بلاشبہ وہ سب لوگوں سے مجھے زیادہ پیارے ہیں۔“ [صحيح البخاري/كتاب المغازي/حدیث: 4468]

حضرت عبداللہ بن عمر رضی اللہ عنہ ہی سے روایت ہے کہ رسول اللہ صلی اللہ علیہ وسلم نے ایک لشکر تیار کیا اور اس پر حضرت اسامہ بن زید رضی اللہ عنہ کو امیر مقرر کیا۔ کچھ لوگوں نے ان کی امارت پر اعتراض کیا تو رسول اللہ صلی اللہ علیہ وسلم نے خطبہ دیتے ہوئے فرمایا: ”اگر تم اس کی امارت پر اعتراض کرتے ہو تو اس سے پہلے تم نے ان کے والد کی امارت پر بھی اعتراض کیا تھا۔ اللہ کی قسم! وہ امارت کے لائق اور اہل تھے اور مجھے لوگوں سے زیادہ عزیز تھے اور بلاشبہ ان کے بعد یہ (اسامہ) مجھے لوگوں سے زیادہ محبوب ہے۔“ [صحيح البخاري/كتاب المغازي/حدیث: 4469]