حضرت عبداللہ بن عمر رضی اللہ عنہما سے روایت ہے کہ حضرت عمر بن خطاب رضی اللہ عنہ نے ایک دھاری دار ریشمی جوڑا فروخت ہوتے دیکھا تو عرض کی: ”اللہ کے رسول! آپ اسے خرید لیں تاکہ وفود سے ملاقات کے وقت اور جمعہ کے دن اسے زیب تن کیا کریں۔“ آپ صلی اللہ علیہ وسلم نے فرمایا: ”اسے وہ پہنتا ہے جس کا آخرت میں کوئی حصہ نہیں ہوتا۔“ اس کے بعد خود نبی صلی اللہ علیہ وسلم نے ایک دھاری دار ریشمی جوڑا حضرت عمر بن خطاب رضی اللہ عنہ کے پاس بطور ہدیہ بھیجا، حضرت عمر بن خطاب رضی اللہ عنہ نے عرض کیا: ”آپ نے مجھے یہ جوڑا عنایت فرمایا ہے حالانکہ میں خود آپ سے اس کے متعلق وہ بات سن چکا ہوں جو آپ نے فرمائی تھی؟“ آپ صلی اللہ علیہ وسلم نے فرمایا: ”میں نے تجھے یہ جوڑا اس لیے دیا ہے کہ تم اسے فروخت کر دو یا کسی کو پہنا دو۔“ [صحيح البخاري/كتاب اللباس/حدیث: 5841]

حضرت انس بن مالک رضی اللہ عنہ سے روایت ہے کہ ”انہوں نے رسول اللہ صلی اللہ علیہ وسلم کی دختر حضرت ام کلثوم رضی اللہ عنہا کو ریشمی سرخ چادر پہنے ہوئے دیکھا۔“ [صحيح البخاري/كتاب اللباس/حدیث: 5842]

حضرت عبداللہ بن عباس رضی اللہ عنہما سے روایت ہے، انہوں نے کہا: ”میں ایک سال تک ٹھہرا رہا حالانکہ میں خواہش مند تھا کہ میں حضرت عمر بن خطاب رضی اللہ عنہ سے ان دو عورتوں کے متعلق دریافت کروں جنہوں نے نبی صلی اللہ علیہ وسلم کے متعلق باہمی اتفاق کر لیا تھا لیکن آپ کا رعب سامنے آ جاتا۔ ایک دن آپ نے دورانِ سفر میں ایک مقام پر قیام کیا اور پیلو کے درختوں کے جھنڈ میں چلے گئے، جب فارغ ہو کر واپس تشریف لائے تو میں نے دریافت کیا تو انہوں نے فرمایا: ”وہ حضرت عائشہ اور حضرت حفصہ رضی اللہ عنہما ہیں۔“ پھر فرمایا: ”ہم دورِ جاہلیت میں عورتوں کو کوئی حیثیت نہ دیتے تھے، جب اسلام آیا اور اللہ تعالیٰ نے ان کے حقوق کا ذکر کیا تو ہمیں معلوم ہوا کہ عورتوں کے بھی ہم پر کچھ حقوق ہیں لیکن پھر بھی ہم اپنے معاملات میں انہیں داخل نہ ہونے دیتے تھے۔ واقعہ یہ ہے کہ ایک دن میرے اور میری بیوی کے درمیان کوئی بات ہو رہی تھی تو اس نے مجھے تیز و تند جواب دیا۔ میں نے اس سے کہا: ”اچھا نوبت اب یہاں تک پہنچ گئی ہے؟“ اس نے مجھے کہا: ”تم مجھے تو یہ کہتے ہو حالانکہ تمہاری دختر رسول اللہ صلی اللہ علیہ وسلم کو اذیت پہنچاتی ہے؟“ (یہ سن کر) میں حضرت حفصہ رضی اللہ عنہا کے پاس آیا اور اسے کہا: ”بیٹی! میں تجھے اللہ اور اس کے رسول صلی اللہ علیہ وسلم کی نافرمانی سے ڈراتا ہوں۔“ آپ صلی اللہ علیہ وسلم کی اذیت کے معاملے میں حضرت حفصہ رضی اللہ عنہا کے پاس گیا، پھر حضرت ام سلمہ رضی اللہ عنہا کے پاس پہنچا اور ان سے بھی یہی بات کہی۔ انہوں نے یہ جواب دیا: ”اے عمر! مجھے آپ پر تعجب ہے کہ آپ خواہ مخواہ ہمارے معاملات میں دخل دینے لگے ہو، صرف رسول اللہ صلی اللہ علیہ وسلم اور آپ کی ازواجِ مطہرات کے معاملات میں دخل دینا باقی تھا اب آپ نے وہ بھی شروع کر دیا“، انہوں نے مجھے یہ بات بار بار کہی۔ قبیلہ انصار کے ایک صحابی تھے جب وہ رسول اللہ صلی اللہ علیہ وسلم کی صحبت میں موجود نہ ہوتے تو میں حاضر ہوتا اور وہاں کی تمام خبریں انہیں آ کر بتاتا اور جب میں رسول اللہ صلی اللہ علیہ وسلم کی مجلس سے غائب ہوتا تو وہ حاضری دیتے اور رسول اللہ صلی اللہ علیہ وسلم کے ارشادات سے مجھے آگاہ کرتے۔ رسول اللہ صلی اللہ علیہ وسلم کے اردگرد جتنے بھی سلاطین تھے ان سب کے ساتھ آپ کے تعلقات ٹھیک تھے، صرف شام کا غسانی بادشاہ رہ گیا تھا، اس سے ہمیں ڈر لگا رہتا تھا کہ مبادا ہم پر حملہ کر دے۔ ایک دن میں نے اپنے انصاری ساتھی کو دیکھا وہ کہہ رہا تھا: ”آج ایک عظیم تر حادثہ ہو گیا ہے“، میں نے پوچھا: ”کیا بات ہوئی؟ کیا غسانی بادشاہ نے حملہ کر دیا ہے؟“ اس نے کہا: ”اس سے بھی عظیم تر حادثہ رونما ہوا ہے، رسول اللہ صلی اللہ علیہ وسلم نے اپنی بیویوں کو طلاق دے دی ہے“۔ میں جلدی سے آیا تو تمام ازواج کے حجروں سے رونے کی آواز آ رہی تھی جبکہ نبی صلی اللہ علیہ وسلم اپنے بالا خانے میں تشریف لے گئے تھے۔ بالا خانے کے دروازے پر ایک نوجوان پہرے دار موجود تھا۔ میں اس کے پاس گیا اور اس سے کہا: ”میرے لیے اندر جانے کی اجازت طلب کرو“، اجازت ملی تو اندر گیا دیکھا کہ نبی صلی اللہ علیہ وسلم ایک چٹائی پر تشریف فرما ہیں، چٹائی کے نشانات آپ کے پہلو پر پڑے ہوئے ہیں، اور آپ کے سر کے نیچے کھال کا ایک تکیہ ہے جس میں کھجور کی چھال بھری ہوئی تھی اور چند کچی کھالیں لٹک رہی تھیں اور کیکر کے پتے پڑے ہوئے تھے۔ میں نے آپ صلی اللہ علیہ وسلم سے ان باتوں کا ذکر کیا جو میں نے حضرت حفصہ اور حضرت ام سلمہ رضی اللہ عنہما سے کہی تھیں اور وہ جواب بھی بتایا جو حضرت ام سلمہ رضی اللہ عنہا نے مجھے دیا تھا۔ رسول اللہ صلی اللہ علیہ وسلم اس پر مسکرا دیے۔ آپ نے اس بالا خانے میں انتیس دن تک قیام فرمایا، پھر (وہاں سے) نیچے اتر آئے۔“ [صحيح البخاري/كتاب اللباس/حدیث: 5843]

حضرت ام سلمہ رضی اللہ عنہا سے روایت ہے، انہوں نے کہا کہ نبی صلی اللہ علیہ وسلم رات کے وقت بیدار ہوئے اور آپ فرما رہے تھے: «لَا إِلٰهَ إِلَّا اللّٰهُ» ”آج کس قدر فتنے نازل ہوئے ہیں؟ اور کس قدر خزانے اترے ہیں؟ کوئی ہے جو ان حجروں میں سونے والیوں کو بیدار کرے؟ دیکھو! بہت سی عورتیں جو دنیا میں لباس پہنتی ہیں وہ قیامت کے روز ننگی ہوں گی۔“ امام زہری رحمہ اللہ بیان کرتے ہیں کہ ہند رحمہا اللہ کی آستینوں میں ان کی انگلیوں کے پاس بٹن لگے ہوئے تھے۔ [صحيح البخاري/كتاب اللباس/حدیث: 5844]

حضرت ام خالد بنت خالد رضی اللہ عنہا سے روایت ہے، انہوں نے کہا کہ رسول اللہ صلی اللہ علیہ وسلم کے پاس کچھ کپڑے لائے گئے جن میں ایک سیاہ شال بھی تھی۔ آپ صلی اللہ علیہ وسلم نے فرمایا: ”تمہارے خیال کے مطابق یہ شال کسے دی جائے؟“ صحابہ کرام خاموش رہے تو آپ نے فرمایا: ”ام خالد کو میرے پاس لاؤ۔“ چنانچہ مجھے نبی صلی اللہ علیہ وسلم کی خدمت میں پیش کیا گیا، پھر آپ نے مجھے وہ شال اپنے ہاتھ سے پہنائی اور دعا فرمائی: «أَبْلِي وَأَخْلِقِي» ”اسے پرانا اور بوسیدہ کرو۔“ یعنی دیر تک جیتی رہو۔ آپ نے دو مرتبہ دعا فرمائی۔ پھر آپ اس شال کے نقش و نگار دیکھنے لگے اور اپنے ہاتھ سے میری طرف اشارہ کر کے فرمایا: ”اے ام خالد! «سَنَاهْ» “ «سَنَاهْ» یہ حبشی زبان کا لفظ ہے جس کے معنیٰ ”کیا ہی خوبصورت“ کے ہیں (راویِ حدیث) اسحاق نے کہا: میرے اہل خانہ میں سے ایک عورت نے مجھ سے بیان کیا کہ اس نے ام خالد رضی اللہ عنہا پر وہ شال دیکھی تھی۔ [صحيح البخاري/كتاب اللباس/حدیث: 5845]

حضرت انس رضی اللہ عنہ سے روایت ہے، انہوں نے کہا کہ نبی صلی اللہ علیہ وسلم نے ”مردوں کو زعفرانی رنگ استعمال کرنے سے منع فرمایا ہے۔“ [صحيح البخاري/كتاب اللباس/حدیث: 5846]

حضرت عبداللہ بن عمر رضی اللہ عنہما سے روایت ہے، انہوں نے کہا کہ نبی صلی اللہ علیہ وسلم نے ”محرم کو ورس اور زعفران سے رنگا ہوا لباس پہننے سے منع فرمایا ہے۔“ [صحيح البخاري/كتاب اللباس/حدیث: 5847]

حضرت براء رضی اللہ عنہ سے روایت ہے، انہوں نے کہا: ”نبی صلی اللہ علیہ وسلم کا قد درمیانہ تھا، میں نے آپ کو سرخ جوڑے میں دیکھا۔ آپ سے زیادہ خوبصورت میں نے کسی کو نہیں دیکھا۔“ [صحيح البخاري/كتاب اللباس/حدیث: 5848]

حضرت براء رضی اللہ عنہ سے روایت ہے، انہوں نے کہا کہ نبی صلی اللہ علیہ وسلم نے ہمیں سات چیزوں کا حکم دیا تھا: ”بیمار کی عیادت کرنے، جنازوں کے ساتھ جانے اور چھینکنے والے کا جواب دینے کا“ اور آپ صلی اللہ علیہ وسلم نے ہمیں ”ریشم، دیبا، درآمد شدہ سرخ ریشمی کپڑا، موٹا ریشم اور سرخ زین پوش“ کے استعمال سے بھی منع فرمایا۔ [صحيح البخاري/كتاب اللباس/حدیث: 5849]

حضرت سعید ابو مسلمہ سے روایت ہے، انہوں نے کہا: ”میں نے حضرت انس رضی اللہ عنہ سے پوچھا: کیا نبی صلی اللہ علیہ وسلم جوتی پہن کر نماز پڑھ لیتے تھے؟“ انہوں نے کہا: ”ہاں (پڑھ لیتے تھے)۔“ [صحيح البخاري/كتاب اللباس/حدیث: 5850]