حدیث حاشیہ:
اے حسان! تونے طوفان کے وقت میری غیبت کی اور مجھ پر جھوٹی تہمت لگائی۔
شعر مذکور کا شعر میں ترجمہ حضرت مولانا وحید الزماں نے یوں کیا ہے۔
عاقلہ ہے پاک دامن ہے ہر عیب سے وہ نیک بخت صبح کرتی ہے وہ بھوکی، بے گنہ کا گوشت وہ کھاتی نہیںحضرت عائشہ رضی اللہ عنہا نے بڑے عذاب کا لفظ اس لئے کہا کہ حضرت حسان بن ثابت انصاری رضی اللہ عنہ آخر میں نابینا ہوگئے تھے۔
یہ شعر مذکور میں قرآن مجید کی اس آیت کی طرف اشارہ ہے۔
جس میں غیبت کو اپنے مردہ بھائی کا گوشت کھانے سے تعبیر کیا گیا ہے۔
یعنی جو عورتیں غافل اور بے پرواہ ہوتی ہیں، ان کی اس عادت کی وجہ سے آپ دوسروں کے سامنے ان کی کسی طرح کی برائی نہیں کر تیں کہ یہ غیبت ہے اور غیبت اپنے مردہ بھائی کا گوشت کھانے کے برابر ہے۔

حدیث حاشیہ:
1۔
حضرت عائشہ رضی اللہ تعالیٰ عنہا نے حضرت حسان بن ثابت رضی اللہ تعالیٰ عنہ کو تنبیہ فرمائی کہ تم تہمت لگانے والوں کے ساتھ شریک ہو کر غیبت کر کے لوگوں کا گوشت کھانے سے خود کو محفوظ نہ رکھ سکے۔
لیکن وہ حضرت حسان رضی اللہ تعالیٰ عنہ کا دفاع بھی کرتی تھیں انھوں نے فرمایا:
حضرت حسان رضی اللہ تعالیٰ عنہ رسول اللہ صلی اللہ علیہ وسلم کی حمایت کیا کرتے تھے۔
(صحیح البخاري، المغازي، حدیث: 4146)
2۔
حضرت حسان رضی اللہ تعالیٰ عنہ سے تہمت لگانے کی غلطی ضرور ہوئی تھی لیکن انھوں نے اس جرم سے توبہ کر لی تھی۔
بہر حال حضرت عائشہ رضی اللہ تعالیٰ عنہا کا دل غلطی کی وجہ سے تہمت لگانے والے صحابہ کرام رضوان اللہ عنھم اجمعین کے متعلق صاف ہو گیا تھا لیکن جب کبھی اس واقعے کا تذکرہ ہوتا تو دل کا رنجیدہ ہونا ایک فطری امر تھا اس مقام پر بھی حضرت عائشہ رضی اللہ تعالیٰ عنہا نے حضرت حسان بن ثابت رضی اللہ تعالیٰ عنہ کے متعلق چبھتا ہوا جملہ اسی تاثر کے پیش نظر بولا تھا۔
واللہ أعلم۔