حدیث حاشیہ:
(1)
حضرت عبداللہ بن مسعود رضی اللہ عنہ کا یہ اثر مختصر طور پر بیان ہوا ہے۔
علامہ اسماعیلی رحمہ اللہ نے اسے وضاحت سے بیان کیا ہے کہ ایک آدمی حضرت عبداللہ بن مسعود رضی اللہ عنہ کے پاس آیا اور کہا:
میں نے اپنا غلام بطور سائبہ آزاد کیا تھا، وہ مرگیا ہے، اس کا ترکہ تو موجود ہے لیکن اس نے اپنا کوئی وارث نہیں چھوڑا۔
حضرت عبداللہ بن مسعود رضی اللہ عنہ نے فرمایا:
مسلمان سائبہ نہیں کرتے۔
دور جاہلیت میں لوگ سائبہ کرتے تھے۔
تو اس کا محسن ہے اور آزادی کی نعمت کا سرپرست ہے، لہٰذا اس کی میراث تیرے لیے ہے......۔
(فتح الباري: 50/12) (2)
قرآن کریم میں سائبہ کا ذکر ہے اور وہاں اس سے مراد وہ جانور ہے جسے مشرکین بتوں کے نام پر آزاد چھوڑ دیتے تھےاور انھیں اپنے کام میں نہیں لاتے تھے۔
اللہ تعالیٰ نے اس رسم کو کالعدم قرار دیا۔
اس بنا پر اگر کوئی اپنے غلام کو اس طرح آزاد کرتا ہے کہ تو اپنا مال جہاں چاہے رکھ لے اور اپنا تعلق جس سے چاہے جوڑ لے تو شریعت نے اسے ناپسند کیا ہے، اور سائبہ غلام کا وارث اس کے آزاد کرنے والے کو قرار دیا ہے۔