حارث بن سوید رحمہ اللہ بیان کرتے ہیں: مجھے عبداللہ رضی اللہ عنہ نے دو حدیثیں سنائیں، ایک رسول اللہ صلی اللہ علیہ وسلم سے اور دوسری اپنی طرف سے، انہوں نے بیان کیا، رسول اللہ صلی اللہ علیہ وسلم نے فرمایا: ”اللہ تعالیٰ اپنے مومن بندے کی توبہ سے زیادہ خوش ہوتا ہے،“ آگے مذکورہ بالا حدیث ہے، امام مسلم رحمہ اللہ نے حضرت عبداللہ بن مسعود رضی اللہ عنہ کی مرفوع حدیث بیان کی ہے لیکن دوسری حدیث جو عبداللہ رضی اللہ عنہ کا قول ہے اس کو چھوڑ دیا، لیکن امام بخاری رحمہ اللہ نے وہ حدیث بھی بیان کی ہے کہ وہ فرماتے ہیں: مومن بندہ سے گناہ سرزد ہو جاتا ہے وہ اپنے گناہوں کو یوں سمجھتا ہے گویا کہ وہ پہاڑ کے دامن میں بیٹھا ہے اور ڈر رہا ہے کہ پہاڑ اس پر گر نہ جائے اور فاجر اپنے گناہوں کو یوں سمجھتا ہے کہ مکھی اس کی ناک پر بیٹھ گئی ہے تو وہ اس کو ہاتھ کے اشارے سے اڑا دیتا ہے۔ (کتاب الدعوات، حدیث نمبر: 6308) [صحيح مسلم/كتاب التوبة/حدیث: 6957]