سیدنا عبدالرحمٰن بن اظہر رضی اللہ عنہ بیان کرتے ہیں: غزوہ حنین کے موقع پر سیدنا خالد بن ولید رضی اللہ عنہ زخمی ہو گئے، نبی کریم صلی اللہ علیہ وسلم میرے پاس سے گزرے میں اس وقت کم سن لڑکا تھا۔ آپ صلی اللہ علیہ وسلم یہ ارشاد فرما رہے تھے: ”کون شخص خالد بن ولید کی رہائشی جگہ تک مجھے لے کر جائے گا؟“ تو میں نبی کریم صلی اللہ علیہ وسلم کے آگے دوڑتا ہوا گیا۔ میں یہ کہتا جا رہا تھا: کون شخص سیدنا خالد بن ولید رضی اللہ عنہ کی رہائشی جگہ تک پہنچائے گا؟ یہاں تک کہ نبی کریم صلی اللہ علیہ وسلم ان کے پاس تشریف لائے وہ اس وقت پالان کے ساتھ ٹیک لگا کر بیٹھے ہوئے تھے۔ انہیں زخم لاحق ہوئے تھے۔ نبی کریم صلی اللہ علیہ وسلم ان کے پاس تشریف فرما ہوئے آپ صلی اللہ علیہ وسلم نے ان کے لیے دعائے رحمت کی۔ (راوی کہتے ہیں) میرا خیال ہے روایت میں یہ الفاظ بھی ہیں: ”نبی کریم صلی اللہ علیہ وسلم نے انہیں دم کیا (یا ان پر لعاب دہن لگایا)۔“ [مسند الحميدي/حدیث: 921]