رکعاتِ تراویح اور سیدنا عمر رضی اللہ عنہ کا حکم:
➊ سیدنا عمر رضی اللہ عنہ یا کسی صحابی سے بھی بیس رکعات تراویح قولاً یا فعلاً ثابت نہیں ہے، بلکہ سیدنا عمر رضی اللہ عنہ نے دو صحابیوں سیدنا ابی بن کعب اور سیدنا تمیم الداری رضی اللہ عنہما کو حکم دیا کہ لوگوں کو گیارہ رکعتیں پڑھائیں۔ [موطأ امام مالک (روایۃ یحییٰ بن یحییٰ): 1/ 114، ح: 249، وسندہ صحیح] [شرح معانی الآثار للطحاوی: 1/ 293]
➋ تقلید کے دعویدار محمد بن علی النیموی نے اس اثر کے بارے میں کہا:
«وإسنادہ صحیح»
”اور اس کی سند صحیح ہے۔“ [آثار السنن: ص: 250، ح: 776]
➌ ان دو صحابیوں میں سے ایک مردوں کو اور دوسرے عورتوں کو تراویح کی نماز پڑھاتے تھے۔ مصنف ابن ابی شیبہ کی ایک روایت کا خلاصہ یہ ہے کہ یہ دونوں صحابی گیارہ رکعات پڑھاتے تھے۔ [مصنف ابن ابی شیبہ: ج: 2، ص: 392، ح: 7670]
➍ سیدنا سائب بن یزید رضی اللہ عنہ سے روایت ہے:
”ہم (یعنی صحابہ) عمر بن خطاب رضی اللہ عنہ کے زمانے میں گیارہ رکعات پڑھتے تھے۔“ [سنن سعید بن منصور بحوالہ الحاوی للفتاوی: ج: 1، ص: 349]
❀ امام سیوطی رحمہ اللہ نے اس روایت کے بارے میں کہا:
«بسند في غایۃ الصحۃ»
”بہت زیادہ صحیح سند کے ساتھ۔“ [الحاوی للفتاوی: ج: 1، ص: 350]
➎ ان صحیح آثار کے مقابلے میں بعض تقلیدی حضرات السنن الکبریٰ للبیہقی اور معرفۃ السنن و الآثار کی جو روایتیں پیش کرتے ہیں، وہ سب شاذ (یعنی ضعیف) ہیں۔
اصل مضمون کے لیے دیکھئے:
[مقالات: جلد 3، صفحہ 602] [ماہنامہ الحدیث: شمارہ نمبر 64، صفحہ 23]