مسلم بن ابراہیم نے بیان کیا کہ ہمیں عبد السلام بن ابوحازم ابو طالوت نے بیان کیا اور کہا کہ میں نے سیدنا ابوبرزہ رضی اللہ عنہ کو دیکھا کہ وہ (یزید بن معاویہ کی جانب سے کوفہ کے امیر) عبیداللہ بن زیاد کے پاس گئے۔ عبد السلام نے کہا: مجھے ایک شخص نے بیان کیا جو اس مجلس میں شریک تھا۔ (ابوداود کہتے ہیں) مسلم بن ابراہیم نے اس کا نام بھی لیا تھا۔ عبیداللہ نے جب سیدنا ابوبرزہ رضی اللہ عنہ کو دیکھا تو کہا: ”اپنے اس موٹے ٹھگنے محمدی کو دیکھو۔“ شیخ اس کی بات سمجھ گئے (کہ اس نے طعنہ دیا ہے) تو انہوں نے کہا: ”مجھے یہ امید نہیں تھی کہ میں اس قوم میں باقی رہوں گا جو مجھے سیدنا محمد صلی اللہ علیہ وسلم کی صحابیت پر طعنہ دے گی۔“ تو عبیداللہ نے ان سے کہا: ”بلاشبہ محمد صلی اللہ علیہ وسلم کی صحبت تمہارے لیے باعثِ عزت ہے، اس میں کوئی عیب کی بات نہیں ہے۔“ پھر اس نے کہا: ”میں نے آپ کو اس لیے بلا بھیجا ہے کہ آپ سے حوض کے متعلق دریافت کروں، کیا آپ نے رسول اللہ صلی اللہ علیہ وسلم کو اس بارے میں کچھ کہتے سنا ہے؟“ تو سیدنا ابوبرزہ رضی اللہ عنہ نے کہا: ”ہاں! کوئی ایک، دو، تین، چار یا پانچ بار نہیں (بلکہ بارہا سنا ہے) تو جو اس کو جھٹلائے اللہ اس کو اس سے نہ پلوائے“، پھر وہ غصے سے باہر نکل آئے۔ [سنن ابي داود/كتاب السنة /حدیث: 4749]