فوائد:
➊ بھول کر کلام کرنے والے کی نماز اور ایسے شخص کی نماز جو خود کو خارج از نماز سمجھے کلام کرنے سے باطل نہیں ہوتی۔
جمہور علمائے سلف و خلف کا یہی موقف ہے اور ابن عباس، عبد اللہ بن زبیر، عروہ، عطاء، حسن بصری، شعبی، قتادہ، اوزاعی، مالک، شافعی، احمد اور جمیع محدثین اسی موقف کے قائل ہیں۔
➋ لیکن ابوحنیفہ و ائمہ احناف اور ثوری کہتے ہیں کہ دورانِ نماز بھول کر اور جہالت سے گفتگو کرنے سے نماز باطل ہو جاتی ہے، ان کی دلیل ابن مسعود اور زید بن ارقم سے مروی روایات ہیں۔ (جن میں مطلق بیان ہے کہ نماز میں بات چیت کرنے سے نماز ٹوٹ جاتی ہے)
پھر ان کا خیال ہے کہ ذوالیدین کے قصہ والی روایت ابن مسعود اور زید بن ارقم کی حدیث کی وجہ سے منسوخ ہے، کیونکہ بقول ان کے ذوالیدین غزوہ بدر کے دن شہید ہوئے تھے اور نماز کا مذکورہ واقعہ غزوہ بدر سے پہلے کا ہے اور حدیثِ ابو ہریرہ کے بارے یہ رائے زنی کرتے ہیں کہ ابو ہریرہ رضی اللہ عنہ کا یہ حدیث بیان کرنا جو غزوہ بدر کے بعد مشرف بہ اسلام ہوئے تھے وہ تنسیخِ حدیث میں محل نہیں، کیونکہ صحابی بسا اوقات ایسا واقعہ بیان کرتا ہے جس میں وہ شریک نہ ہوا ہو اس طور کہ وہ ایسا واقعہ نبی کریم صلی اللہ علیہ وسلم سے یا کسی اور صحابی سے سنتا ہے۔
➌ علماء نے ان کے اعتراضات اور دعویٰ تنسیخِ روایتِ ابی ہریرہ کے کئی جوابات دیے ہیں جن میں بہترین جواب ابو عمر ابن عبد البر کا ہے۔
◈ وہ کہتے ہیں:
”احناف کا یہ دعویٰ کہ حدیثِ ابی ہریرہ، حدیثِ ابن مسعود رضی اللہ عنہ کی وجہ سے منسوخ ہے، باطل ہے۔
کیونکہ جمیع محدثین و اہل سیر کا اس بات پر اتفاق ہے کہ حدیثِ ابن مسعود رضی اللہ عنہ کا قصہ مکہ میں ہجرتِ حبشہ سے رجوع پر ہجرتِ مدینہ سے قبل پیش آیا ہے اور حدیثِ ابی ہریرہ رضی اللہ عنہ میں ذوالیدین کا واقعہ مدینہ میں پیش آیا تھا اور ابو ہریرہ رضی اللہ عنہ سات ہجری کو غزوہ خیبر کے سال مشرف بہ اسلام ہوئے تھے، (لہٰذا متقدم حدیث متاخر حدیث کی ناسخ کیسے ہو سکتی ہے؟)
پھر حدیثِ زید بن ارقم میں یہ وضاحت نہیں کہ یہ حدیثِ ابی ہریرہ رضی اللہ عنہ سے پہلے کی ہے یا بعد کی اور تحقیق و تدقیق سے معلوم ہوتا ہے کہ حدیثِ زید، حدیثِ ابی ہریرہ رضی اللہ عنہ سے پہلے کی ہے۔“ [شرح النووي: 70/5]