فوائد:

➊ اس حدیث میں تمام اوقات میں مسواک کرنے کی فضیلت، مسواک کا خاص اہتمام اور بار بار مسواک کرنے کی فضیلت کا بیان ہے۔ [شرح صحيح مسلم للنووي: 143/3]
➋ ◈ علامہ قرطبی فرماتے ہیں: ممکن ہے گھر داخل ہوتے وقت مسواک کرنے کی وجہ یہ ہو کہ آپ صلی اللہ علیہ وسلم نے گھر میں داخل ہوکر نوافل ادا کرنے ہوں اور اس لیے گھر داخل ہوتے وقت مسواک کرتے ہوں، کیونکہ آپ مسجد میں نوافل شاذ و نادر ہی ادا کرتے تھے۔
ایک اور قول ہے کہ اس وقت مسواک کرنے کی حکمت یہ تھی کہ بعض اوقات لوگوں سے گفتگو کی وجہ سے منہ کی بو تبدیل ہو جاتی تھی۔
لہٰذا گھر داخل ہوتے وقت اہل خانہ سے حسن معاشرت کی خاطر اس بو کے ازالے کے لیے مسواک کرتے تھے، نیز حدیث الباب دلیل ہے کہ گھر داخل ہوتے وقت مسواک کرنا مستحب عمل ہے۔ [شرح سنن النسائي: 10/1]