فوائد:
➊ ان احادیث میں نمازِ کسوف کی مختلف صورتوں کا بیان ہے اور بعض روایات میں ایک رکعت میں تین، بعض میں چار اور بعض میں پانچ رکوعات کا بیان ہے، لیکن اکثر روایات میں ہر رکعت میں دو رکوع اور دو رکعتوں میں چار رکوعات کا بیان ہے، چنانچہ شافعی، مالک، لیث، احمد، ابوثور اور جمہور علماء رحمہم اللہ نے اسی موقف کو اختیار کیا ہے کہ نمازِ کسوف میں ہر رکعت میں دو قیام اور دو رکوع مسنون ہیں۔
➋ ◈ ابن عبد البر رحمہ اللہ کہتے ہیں: یہ موقف راجح ہے اور باقی روایات صحیح روایات کے مخالف اور معلل و ضعیف ہیں۔
نیز علامہ البانی رحمہ اللہ نے بھی اسی موقف کو ترجیح دی ہے اور باقی روایات کو شاذ قرار دیا ہے۔ [شرح النووي: 197/6]
➌ ◈ شوکانی رحمہ اللہ کہتے ہیں: اگر سورج گہن کے متعدد واقعات ہوں تو جن روایات میں کثرتِ رکوعات کا بیان ہے ان کو حجت پکڑنا درست ہے کیونکہ اس صورت میں روایات میں اختلاف نہیں ہے۔
لیکن اگر واقعہ ایک ہی ہے تو ترجیح کی صورت اختیار کرنا لازم ہے، اور جن روایات میں ہر رکعت میں دو رکوعات کا بیان ہے وہ ترجیح بین الاحادیث کے اعتبار سے راجح ہیں۔ [نیل الأوطار: 347/3]