فوائد:
➊ یہ احادیث اس بات کی دلیل ہیں کہ فطرانہ میں مروجہ پیمانہ ہر جنس سے ایک صاع ادا کرنا ہے۔ عہدِ رسالت میں ہر جنس سے فطرانہ کی ادائیگی صاع ہی کی صورت میں ہوئی تھی، مختلف اجناس کی گرانی پیشِ نظر نہیں تھی۔ معاویہ رضی اللہ عنہ نے اپنے دورِ خلافت میں ذاتی رائے سے گندم کا نصف صاع فطرانہ مقرر کیا۔ پھر عبداللہ بن عمر رضی اللہ عنہ اور ابوسعید خدری رضی اللہ عنہ کا ان کے اس اجتہاد کی مخالفت کرنا اور احادیثِ نبویہ سے ہر جنس سے ایک صاع فطرانہ کی مقدار کی تعیین اس بات کی دلیل ہے کہ گندم اور دیگر اجناس میں سے ایک صاع ہی ادا کیا جائے، یہی موقف راجح اور قرینِ صواب ہے۔
➋ اجناس کی قیمتوں کا تعیین مقصود ہو تو اس اجتہاد کے پیشِ نظر چونکہ مختلف اجناس کی قیمتیں مختلف ہیں اور کوئی ایک جنس فطرانہ میں معین نہیں، لہذا اگر کھجور اور انگور کو معیار مقرر کیا جائے تو ان کی قیمتوں کے مقابلہ میں اب گندم کے کئی صاع فطرانہ بنتے ہیں۔ اور اگر گندم اور جو کو معیار مقرر کیا جائے، تو فطرانہ میں کھجور اور انگور کی مقدار صاع سے کہیں کم بنے گی۔ لہذا احادیثِ نبوی اور فطرانہ کی صحیح ادائیگی کے لیے ہر جنس سے صاع متعین کرنا ہی بہتر ہے۔