فوائد:
➊ یہ احادیث دلیل ہیں کہ میت کی طرف سے صدقہ کرنا جائز و مستحب ہے اور میت کی طرف سے کیے جانے والے صدقات کا ثواب میت کو پہنچتا ہے۔ ایسے صدقات میت اور صدقہ کرنے والے دونوں کو فائدہ دیتے ہیں، اس پر تمام اہل اسلام کا اجماع ہے۔ نیز یہ احادیث اللہ تعالیٰ کے فرمان ﴿وَأَنْ لَيْسَ لِلْإِنْسَانِ إِلَّا مَا سَعَى﴾ ”انسان کے لیے وہی ہے جس کے لیے اس نے کوشش کی۔“ [سورة النجم: 39] کو خاص کرنے والی ہیں۔ [شرح النووي: 84/11]
➋ میت صدقہ کی وصیت کرے تو ایسی وصیت قرآن و سنت کے موافق ہو تو اس پر عمل کرنا چاہیے۔
➌ میت کی طرف سے صدقہ و خیرات میت کے لیے مفید ہیں۔
➍ میت کے لیے افضل صدقہ کنواں کھدوانا، نل لگوانا یا عامۃ الناس کی بہتری کے لیے پبلک مقامات پر پانی کا بندوبست کرنا ہے، یہ زندہ اور مردہ شخص کی طرف سے بہترین صدقہ کی قسم ہے۔