فوائد:
➊ ◈ علماء بیان کرتے ہیں کہ عشاء سے قبل سونے کی کراہت کا سبب یہ ہے کہ عشاء سے قبل گہری نیند سونے کا خدشہ ہے، یا نماز عشاء کے پسندیدہ اور افضل وقت کے چھوٹ جانے کا خدشہ ہے۔
➋ ◈ نیز یہ فعل اس لیے بھی مکروہ ہے کہ اس سے لوگ کاہلی کا شکار ہو کر نماز باجماعت کے وقت سوتے نہ رہ جائیں (لہذا عشاء سے قبل سونا مکروہ ہے)۔
➌ ◈ اور عشاء کے بعد باتیں کرنے کی کراہت کا سبب یہ ہے کہ یہ رات کی بیداری کا سبب ہے، پھر نیند کے غلبے کی وجہ سے قیام اللیل، رات کے اذکار اور نماز فجر کے چھوٹنے کا ڈر ہے۔
➍ ◈ نیز رات کی بیداری دن کے اوقات میں حقوق الدین، نیک کاموں اور دنیاوی مصالح کو انجام دینے میں سستی کا باعث ہے (لہذا عشاء کے بعد باتیں کرنا مکروہ فعل ہے)۔
➎ ◈ علماء کہتے ہیں کہ عشاء کے بعد گپیں ہانکنا اور غیر ضروری باتیں مکروہ ہیں، البتہ مصلحت و حکمت اور خیر کی باتیں کرنے میں کوئی کراہت نہیں ہے۔ [شرح صحيح مسلم للنووي: 146/5]