فوائد:
➊ یہ احادیث دلیل ہیں کہ نماز میں ہاتھ باندھنا مستحب فعل ہے اور حالت قیام میں ہاتھوں کو کھلا چھوڑنا اور لٹکانا غیر مسنون فعل ہے۔
جمہور علماء کا بھی یہی موقف ہے۔
البتہ ابن منذر رحمہ اللہ نے ابن زبیر، حسن بصری اور نخعی رحمہم اللہ سے نقل کیا ہے کہ نمازی ہاتھ کھلے چھوڑتے تھے یا بائیں ہاتھ پر دایاں ہاتھ نہیں رکھتے تھے۔
نیز لیث بن سعد، قاسمیہ، ناصریہ اور مالک رحمہ اللہ سے بھی یہی منقول ہے۔ ** [نیل الأوطار: 191/2] **
لیکن جمہور علماء کا قول دلائل کی رو سے قوی اور راجح ہے۔
➋ حدیث 679 واضح نص ہے کہ قیام کی حالت میں ہاتھ سینے پر باندھنے چاہئیں۔
اور زیر ناف ہاتھ باندھنے کے بارے میں جتنی روایات منقول ہیں، وہ ضعیف ہونے کی وجہ سے ناقابل اعتبار ہیں۔
نیز کچھ علماء کا موقف لے کر ہاتھ ناف سے اوپر اور سینے سے نیچے باندھنا بھی مرجوح ہے۔
جب کہ سینے پر ہاتھ باندھنے کے بارے میں واضح نص کی وجہ سے نماز میں سینے پر ہاتھ باندھنا ہی مسنون ومستحب طریقہ ہے، اس کے علاوہ کوئی اور طریقہ رسول اللہ صلی اللہ علیہ وسلم سے ثابت نہیں ہے۔
❀ نیز یہ حدیث سیدنا سہل بن سعد رضی اللہ عنہ بیان کرتے ہیں:
«كَانَ النَّاسُ يُؤْمَرُونَ أَنْ يَضَعَ الرَّجُلُ يَدَهُ الْيُمْنَى عَلَى ذِرَاعِهِ الْيُسْرَى فِي الصَّلَاةِ.»
”لوگوں کو حکم دیا جاتا تھا کہ وہ نماز میں دایاں ہاتھ بائیں ذراع (کہنی) پر رکھیں۔“ ** [صحیح البخاري: 740] **
یہ حدیث جمہور علماء کے موقف کی تائید کرتی ہے، کیونکہ دایاں ہاتھ بائیں کہنی پر رکھنے سے ہاتھ خود بخود سینے پر آ جاتے ہیں۔