حضرت کعب نے لوگوں سے ارشاد فرمایا کہ کیا تمہیں معلوم ہے اس قول خدا وندی کا کیا مطلب ہے { وَإِنْ مِنْکُمْ إِلاَّ وَارِدُہَا }؟ لوگوں نے عرض کیا کہ ہمارے خیال میں اس سے مراد جہنم میں داخل ہونا ہے۔ فرمایا نہیں اس سے مراد یہ ہے کہ جہنم کو لایا جائے گا اور اسے لوگوں کے لیے یوں پھیلا دیا جائے گا گویا وہ جمی ہوئی چربی کی سطح ہو۔ جب اس پر سب نیک اور برے لوگ کھڑے ہوجائیں گے تو ایک پکارنے والا اعلان کرے گا کہ اپنے لوگوں کو لے لے اور میرے لوگوں کو چھوڑ دے۔ پس جہنم اپنے ہر دوست کو لے کر دھنس جائے گی۔ جہنم انہیں اتنا جانتی ہوگی جتنا ماں باپ بھی اولاد کو نہیں پہچانتے۔ مومن اس سے اس حال میں نجات پالیں گے کہ ان کے کپڑے بھی محفوظ ہوں گے۔ جہنم کے داروغہ کا جسم اتنا بڑا ہے کہ اس کے دونوں شانوں کے درمیان ایک سال کی مسافت ہے، اس کے پاس لوہے کا ستون ہے جس کی دو شاخیں ہیں۔ وہ اس سے ایک دھکا دیتا ہے تو نو لاکھ یا جتنے اللہ چاہے جہنم میں گر پڑتے ہیں۔ [مصنف ابن ابي شيبه/كتاب الجنة/حدیث: 36885]