سیدنا مقداد بن اسود رضی اللہ عنہ بیان کرتے ہیں: سیدنا علی بن ابوطالب رضی اللہ عنہ نے انہیں ہدایت کی کہ وہ نبی اکرم صلی اللہ علیہ وسلم سے ایسے شخص کے بارے میں دریافت کریں کہ جب وہ اپنی بیوی کے قریب ہوتا ہے (تو اس کی مذی خارج ہو جاتی ہے) تو ایسے شخص پر کیا بات لازم ہو گی (سیدنا علی رضی اللہ عنہ نے وضاحت کی)، کیونکہ نبی اکرم صلی اللہ علیہ وسلم کی صاحب زادی میری اہلیہ ہے۔ اس لئے مجھے خود ان سے حیا آتی ہے۔ سیدنا مقداد رضی اللہ عنہ بیان کرتے ہیں: میں نے نبی اکرم صلی اللہ علیہ وسلم سے اس بارے میں دریافت کیا، تو آپ نے ارشاد فرمایا: جب وہ شخص اس طرح کی صورت حال پائے، تو اپنی شرم گاہ پر پانی چھٹرک لے اور نماز کے وضو کی طرح وضو کر لے۔ (امام ابن حبان رحمہ اللہ فرماتے ہیں:) سیدنا مقداد رضی اللہ عنہ بن اسود رضی اللہ عنہ کا انتقال 33 ہجری میں ہوا جبکہ سلیمان بن یسار کا انتقال 90 ہجری میں ہوا جس وقت سلیمان بن یسار نے سیدنا مقداد رضی اللہ عنہ سے احادیث کا سماع کیا تھا۔ اس وقت ان کی عمر 10 سال سے کم تھی۔ [صحیح ابن حبان/كتاب الطهارة/حدیث: 1101]