سیدنا جابر بن عبداللہ رضی اللہ عنہما بیان کرتے ہیں کہ ایک انصاری خاتون نے ہماری دعوت کی، اس نے بکری ذبح کی تھی اور کھانا تیار کیا تھا، اس نے کھجوروں کے جھنڈ کے نیچے پانی چھڑک دیا تھا۔ نبی اکرم صلی اللہ علیہ وسلم نے وضو کے لیے پانی منگوایا، آپ صلی اللہ علیہ وسلم نے وضو کیا اور نماز ادا کی، پھر ہم بچے ہوئے کھانے کے پاس آئے، آپ صلی اللہ علیہ وسلم نے اسے کھایا، پھر نبی اکرم صلی اللہ علیہ وسلم نے نماز ادا کی اور ازسرنو وضو نہیں کیا۔ (سیدنا جابر رضی اللہ عنہ بیان کرتے ہیں:) ایک مرتبہ میں سیدنا ابوبکر رضی اللہ عنہ کی خدمت میں حاضر ہوا، انہوں نے کھانا منگوایا تو انہیں کوئی چیز کھانے کے لیے نہیں ملی، انہوں نے دریافت کیا: تمہاری وہ بکری کہاں ہے جس نے بچہ دیا ہے؟ تو اہلیہ نے عرض کی: وہ یہاں ہے، پھر انہوں نے اسے بلوایا اور اپنے ہاتھ کے ذریعے اس کا دودھ دوہ لیا، پھر انہوں نے اس کا لبا (مخصوص قسم کا کھانا) تیار کیا، سیدنا ابوبکر رضی اللہ عنہ نے اسے کھایا، پھر انہوں نے نماز ادا کی اور ازسرنو وضو نہیں کیا۔ (سیدنا جابر رضی اللہ عنہ بیان کرتے ہیں:) ایک مرتبہ میں نے سیدنا عمر رضی اللہ عنہ کے ہمراہ رات کا کھانا کھایا، ان کی خدمت میں دو پیالے پیش کیے گئے، ایک پیالہ سیدنا عمر رضی اللہ عنہ کے سامنے رکھا گیا اور دوسرا حاضرین کے سامنے رکھا گیا (سب نے کھانا کھا لیا)، سیدنا عمر رضی اللہ عنہ نے نماز ادا کی اور انہوں نے ازسرنو وضو نہیں کیا۔ (امام ابن حبان رحمہ اللہ فرماتے ہیں:) یہاں روایت کے متن میں استعمال ہونے والے لفظ «الصُّوَرُ» سے مراد کھجور کے درختوں کا اکٹھا ہونا ہے۔ [صحیح ابن حبان/كتاب الطهارة/حدیث: 1139]