سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے پردہ ہٹایا تو لوگ سیدنا ابوبکر رضی اللہ عنہ کے پیچھے صفیں بنائے ہوئے تھے، نبی اکرم صلی اللہ علیہ وسلم نے فرمایا: ”اے لوگو! نبوت کے مبشرات میں سے اب صرف سچے خواب باقی رہ گئے ہیں، جنہیں کوئی مسلمان دیکھتا ہے یا جو اسے دکھائے جاتے ہیں۔“ پھر آپ صلی اللہ علیہ وسلم نے ارشاد فرمایا: ”خبردار! مجھے اس بات سے منع کیا گیا ہے کہ میں رکوع یا سجدے کے دوران تلاوت کروں۔ جہاں تک رکوع کا تعلق ہے، تو تم اس میں پروردگار کی عظمت کا اعتراف کرو اور جہاں تک سجدے کا تعلق ہے، تو تم اس میں اہتمام کے ساتھ دعا مانگو کیونکہ وہ اس لائق ہو گی کہ اسے تمہارے لیے مستجاب کیا جائے۔“ [صحیح ابن حبان/كتاب الصلاة/حدیث: 1896]