امام ابن خزیمہ نے اپنی سند کے ساتھ ابن اسحاق نامی راوی کے حوالے سے یہ روایت نقل کی ہے وہ کہتے ہیں انہوں نے مجھے نبی اکرم صلی اللہ علیہ وسلم پر درود بھیجنے کے بارے میں روایت بیان کی تھی جب کوئی شخص نماز کے دوران آپ پر درود بھیجتا ہے۔ سیدنا ابومسعود بیان کرتے ہیں۔ ایک شخص آیا اور نبی اکرم صلی اللہ علیہ وسلم کے سامنے آ کر بیٹھ گیا۔ اس وقت ہم آپ کے پاس موجود تھے۔ اس شخص نے عرض کی: جہاں تک آپ پر سلام بھیجنے کا تعلق ہے اس کا ہمیں پتہ چل گیا ہے، جب ہم نماز پڑھ رہے ہوں، تو ہم آپ پر درود کیسے بھیجیں۔اللہ تعالیٰ آپ پر درود نازل کرے۔ راوی بیان کرتے ہیں: نبی اکرم صلی اللہ علیہ وسلم خاموش رہے، یہاں تک کہ ہم نے یہ بات پسند کی، اس شخص نے آپ سے یہ سوال نہ کیا ہوتا۔ نبی اکرم صلی اللہ علیہ وسلم نے فرمایا: جب تم مجھ پر درود بھیجنے لگو تو تم یہ پڑھو۔ ”اے اللہ! تو امی نبی سیدنا محمد صلی اللہ علیہ وسلم اور سیدنا محمد صلی اللہ علیہ وسلم کی آل پر درود نازل کر جس طرح تو نے سیدنا ابراہیم علیہ السلام اور سیدنا ابراہیم علیہ السلام کی آل پر درود نازل کیا، اور تو امی نبی سیدنا محمد صلی اللہ علیہ وسلم اور سیدنا محمد صلی اللہ علیہ وسلم کی آل پر برکت نازل کر جس طرح تو نے سیدنا ابراہیم اور سیدنا ابراہیم کی آل پر برکت نازل کی: بے شک تو لائق حمد اور بزرگی کا مالک ہے۔“ [صحیح ابن حبان/كتاب الصلاة/حدیث: 1959]