سیدنا ابوذر غفاری رضی اللہ عنہ، روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”بنی اسرائیل سے تعلق رکھنے والا ایک عبادت گزار شخص عبادت کیا کرتا تھا۔ اس نے اپنی عبادت گاہ میں ساٹھ برس تک عبادت کی ایک مرتبہ بارش ہوئی اور زمین سرسبز و شاداب ہو گئی۔ اس راہب نے اپنی عبادت گاہ سے باہر جھانک کر دیکھا، تو اس نے سوچا اگر میں نیچے جا کراللہ تعالیٰ کا ذکر کروں، تو میں زیادہ بھلائی حاصل کر لوں گا۔ پھر وہ وہاں سے نیچے اتر آیا اس کے ساتھ ایک یا شاید دو روٹیاں تھیں۔ ابھی وہ زمین میں پہنچا تھا کہ ایک عورت سے اس کی ملاقات ہوئی۔ وہ راہب اس عورت سے بات چیت کرنے لگا۔ وہ عورت اس شخص کے ساتھ بات چیت کرنے لگی، یہاں تک کہ اس شخص نے اس عورت کے ساتھ زنا کر لیا پھر اس پر مدہوشی طاری ہوئی، تو وہ غسل کرنے کے لئے کنویں میں اتر گیا۔ اسی دوران ایک مانگنے والا اس کے پاس آیا، تو اس نے اپنے ہاتھ کے ذریعے اشارہ کیا کہ ان دو روٹیوں، یا ایک روٹی کو لے لو، پھر وہ راہب فوت ہو گیا، تو اس کی ساٹھ سال کی عبادت کا وزن اس ایک مرتبہ زنا کرنے کے ساتھ کیا گیا، تو وہ زنا کرنا اس کی نیکیوں سے زیادہ وزنی تھا پھر وہ ایک یا دو روٹیاں اس کی نیکیوں کے ساتھ رکھی گئیں، تو اس کی نیکیوں کا پلڑا بھاری ہو گیا اور اس شخص کی مغفرت ہو گئی۔“
امام ابن حبان رحمہ اللہ فرماتے ہیں: یہ روایت غالب بن وزیر نامی راوی نے وکیع نامی راوی سے بیت المقدس میں سنی تھی۔ انہوں نے یہ روایت عراق میں بیان نہیں کی یہ ان روایات میں سے ایک ہے جنہیں اہل فلسطین، وکیع کے حوالے سے نقل کرنے میں منفرد ہیں۔ [صحیح ابن حبان/كتاب البر والإحسان/حدیث: 378]