مالک بن حسن اپنے والد کے حوالے سے اپنے دادا (سیدنا مالک بن حویریث رضی اللہ عنہ) کا یہ بیان نقل کرتے ہیں کہ ایک مرتبہ نبی اکرم صلی اللہ علیہ وسلم منبر پر چڑھے، جب آپ صلی اللہ علیہ وسلم نے پہلے زینے پر قدم رکھا تو آپ صلی اللہ علیہ وسلم نے کہا: «آمِيْنَ» ”آمین“ اور جب آپ صلی اللہ علیہ وسلم نے دوسرے زینے پر قدم رکھا تو آپ صلی اللہ علیہ وسلم نے کہا: «آمِيْنَ» ”آمین“، جب آپ صلی اللہ علیہ وسلم نے تیسرے زینے پر قدم رکھا تو آپ صلی اللہ علیہ وسلم نے کہا: «آمِيْنَ» ”آمین“۔ پھر آپ صلی اللہ علیہ وسلم نے ارشاد فرمایا: ”جبرائیل علیہ السلام میرے پاس آئے اور انہوں نے کہا: اے محمد صلی اللہ علیہ وسلم ! جو شخص رمضان کا مہینہ پائے اور اس کی مغفرت نہ ہو، تو اللہ تعالیٰ اسے (اپنی رحمت سے) دور کر دے، تو میں نے کہا: «آمِيْنَ» ”آمین“۔ جبرائیل علیہ السلام نے کہا: جو شخص اپنے ماں باپ یا ان دونوں میں سے کسی ایک کو پائے اور پھر بھی جہنم میں داخل ہو جائے، تو اللہ تعالیٰ اسے (اپنی رحمت سے) دور کرے، تو میں نے کہا: «آمِيْنَ» ”آمین“۔ جبرائیل علیہ السلام نے کہا: جس شخص کے سامنے آپ کا تذکرہ ہو اور وہ آپ پر درود نہ بھیجے، تو اللہ تعالیٰ اسے (اپنی رحمت سے) دور کر دے، آپ آمین کہیں، تو میں نے کہا: «آمِيْنَ» ”آمین“۔“ (امام ابن حبان رحمہ اللہ فرماتے ہیں:) اس روایت میں اس بات کی دلیل موجود ہے کہ آدمی کے لیے یہ بات مستحب ہے کہ اپنی ذات کے لیے مدد حاصل کرنے کو ترک کر دے، خصوصاً اس صورت میں جب آدمی ایسی شخصیت کا مالک ہو جس کے فعل کی پیروی کی جاتی ہو۔ اس کی وجہ یہ ہے کہ نبی اکرم صلی اللہ علیہ وسلم سے جب سیدنا جبرائیل علیہ السلام نے یہ کہا: ”جو شخص رمضان کا مہینہ پا لے اور اس کی مغفرت نہ ہو، تو اللہ تعالیٰ اسے اپنی مغفرت سے دور کر دے۔“ تو نبی اکرم صلی اللہ علیہ وسلم نے جلدی سے یہ کہا: «آمِيْنَ» ”آمین“۔ اسی طرح جب سیدنا جبرائیل علیہ السلام نے یہ کہا: ”جو شخص اپنے ماں باپ یا ان دونوں میں سے کسی ایک کو پائے اور جہنم میں داخل ہو جائے، تو اللہ تعالیٰ اسے اپنی رحمت سے دور کر دے۔“ (تو نبی اکرم صلی اللہ علیہ وسلم نے فوراً آمین کہہ دیا) لیکن جب سیدنا جبرائیل علیہ السلام نے آپ صلی اللہ علیہ وسلم کے سامنے یہ کہا: ”جس شخص کے سامنے آپ کا ذکر کیا جائے اور وہ آپ پر درود نہ بھیجے، تو اللہ تعالیٰ اسے (اپنی رحمت سے دور کر دے)۔“ تو نبی اکرم صلی اللہ علیہ وسلم نے فوراً آمین نہیں کہا، کیونکہ اس جملے میں آپ صلی اللہ علیہ وسلم کی ذات کا حصہ موجود تھا۔ یہاں تک کہ سیدنا جبرائیل علیہ السلام نے آپ صلی اللہ علیہ وسلم سے گزارش کی کہ آپ آمین کہیں، تو نبی اکرم صلی اللہ علیہ وسلم فرماتے ہیں: ”میں نے آمین کہہ دیا۔“ نبی اکرم صلی اللہ علیہ وسلم کی اس سے مراد یہ تھی کہ اس بارے میں آپ صلی اللہ علیہ وسلم اسوہ قائم کریں کہ اپنی ذات کے لیے کسی دوسرے سے مدد حاصل نہیں کرنی ہے، کیونکہ اللہ تعالیٰ دنیا اور آخرت میں اپنے دوستوں کا مددگار ہے، اگرچہ وہ دنیا میں لوگوں کی مدد کو ناپسند کرتے ہیں۔ [صحیح ابن حبان/كتاب البر والإحسان/حدیث: 409]