سیدنا اسامہ بن زید رضی اللہ عنہما بیان کرتے ہیں: ایک مرتبہ ہم نبی اکرم صلی اللہ علیہ وسلم کے پاس موجود تھے، آپ صلی اللہ علیہ وسلم کی ایک صاحبزادی کی طرف سے ایک پیغام رساں آیا، اس نے عرض کی: یا رسول اللہ! آپ کی صاحبزادی نے آپ کو یہ پیغام بھیجا ہے کہ آپ ان کے ہاں تشریف لے آئیں کیونکہ ان کے صاحبزادے فوت ہونے والے ہیں۔ نبی اکرم صلی اللہ علیہ وسلم نے فرمایا: ”تم اس کے پاس جا کر اس سے کہو کہ «إِنَّ لِلَّهِ مَا أَخَذَ، وَلَهُ مَا أَعْطَى، وَكُلُّ شَيْءٍ عِنْدَهُ بِأَجَلٍ مُسَمًّى» ”اللہ تعالیٰ جو چیز واپس لے وہ اسی کی ملکیت ہے، جو چیز اسی نے دی ہو وہ چیز بھی اسی کی ملکیت ہے اور اس کی بارگاہ میں ہر چیز کی ایک متعین مدت ہے“، اس لیے اسے صبر سے کام لینا چاہیے اور ثواب کی امید رکھنی چاہیے۔“ راوی بیان کرتے ہیں: کچھ دیر بعد وہ شخص واپس آیا اور عرض کی: یا رسول اللہ! وہ آپ کو قسم دے رہی ہیں کہ آپ ان کے ہاں ضرور تشریف لے جائیں، تو نبی اکرم صلی اللہ علیہ وسلم کھڑے ہو گئے، آپ صلی اللہ علیہ وسلم کے ساتھ ہم بھی کھڑے ہو گئے، جو انصار کے کچھ افراد تھے، ہم ان کے ہاں گئے، اس بچے کو نبی اکرم صلی اللہ علیہ وسلم کی خدمت میں پیش کیا گیا تو اس کا سانس سینے میں اکھڑ کر آ رہا تھا، نبی اکرم صلی اللہ علیہ وسلم کی آنکھوں سے آنسو جاری ہو گئے۔ سیدنا سعد بن عبادہ رضی اللہ عنہ نے آپ صلی اللہ علیہ وسلم کی خدمت میں عرض کی: یا رسول اللہ! یہ کس وجہ سے ہیں؟ نبی اکرم صلی اللہ علیہ وسلم نے فرمایا: ”یہ وہ رحمت ہے جو اللہ تعالیٰ نے اپنے بندوں کے دلوں میں رکھی ہے اور اللہ تعالیٰ اپنے رحم کرنے والے بندوں پر ہی رحم کرتا ہے۔“ [صحیح ابن حبان/كتاب البر والإحسان/حدیث: 461]