مصعب بن سعد اپنے والد (سیدنا سعد بن ابی وقاص رضی اللہ عنہ) کا یہ بیان نقل کرتے ہیں: میرے بارے میں شراب کی حرمت کا حکم نازل ہوا، میں کچھ لوگوں کے ساتھ شراب پی رہا تھا، یہ شراب کو حرام قرار دیے جانے سے پہلے کی بات ہے، ان میں سے ایک آدمی نے میری ناک پر اونٹ کی ہڈی مار دی، میں نبی اکرم صلی اللہ علیہ وسلم کی خدمت میں حاضر ہوا، میں نے آپ صلی اللہ علیہ وسلم کے سامنے اس بات کا ذکر کیا تو اللہ تعالیٰ نے شراب کی حرمت سے متعلق حکم نازل کر دیا۔ سیدنا سعد بن ابی وقاص رضی اللہ عنہ بیان کرتے ہیں: غزوہ بدر کے موقع پر مجھے ایک تلوار ملی، میں نے نبی اکرم صلی اللہ علیہ وسلم سے اس بارے میں دریافت کیا، تو یہ آیت نازل ہوئی: ﴿يَسْأَلُونَكَ عَنِ الْأَنْفَالِ ۖ قُلِ الْأَنْفَالُ لِلَّهِ وَالرَّسُولِ﴾ [سورة الأنفال: 1] ”لوگ تم سے مالِ غنیمت کے بارے میں دریافت کرتے ہیں، تم یہ فرما دو! انفال اللہ اور اس کے رسول کے لیے مخصوص ہے۔“ [صحیح ابن حبان/كتاب الأشربة/حدیث: 5349]