سیدنا ابوموسیٰ اشعری رضی اللہ عنہ بیان کرتے ہیں کہ جب نبی اکرم صلی اللہ علیہ وسلم نے مجھے اور سیدنا معاذ بن جبل رضی اللہ عنہما کو یمن بھیجا تو آپ صلی اللہ علیہ وسلم نے ہمیں یہ ہدایت کی کہ ہم میں سے ہر ایک اپنے ساتھی کے قریب رہے۔ آپ صلی اللہ علیہ وسلم نے ہم سے فرمایا: «يَسِّرَا وَلَا تُعَسِّرَا، وَبَشِّرَا وَلَا تُنَفِّرَا» ”تم دونوں آسانی فراہم کرنا، تنگی پیدا نہ کرنا، خوشخبری سنانا اور متنفر نہ کرنا۔“ جب ہم اٹھنے لگے، تو میں نے عرض کی: یا رسول اللہ صلی اللہ علیہ وسلم ! آپ ہمیں دو طرح کے مشروبات کے بارے میں حکم بیان کر دیجیے جو ہم تیار کرتے ہیں۔ ایک «البِتْعُ» (بتع) ہے جو شہد سے بنایا جاتا ہے، اس کی نبیذ تیار کی جاتی ہے یہاں تک کہ وہ پختہ ہو جاتی ہے، اور «المِزْرُ» (مزر) ہے جسے جو اور مکئی سے بنایا جاتا ہے، اس کی نبیذ ہوتی ہے یہاں تک کہ اس میں شدت آ جاتی ہے۔ نبی اکرم صلی اللہ علیہ وسلم کو چونکہ جامع اور مانع کلمات عطا کیے گئے تھے، اس لیے آپ صلی اللہ علیہ وسلم نے ارشاد فرمایا: «كُلُّ مُسْكِرٍ حَرَامٌ» ”تم پر ہر وہ چیز حرام ہے جو نشہ آور ہو، جو نماز سے روک دے۔“ راوی بیان کرتے ہیں کہ ایک دن سیدنا معاذ رضی اللہ عنہ میرے پاس آئے، اس وقت میرے پاس ایک شخص موجود تھا جو پہلے یہودی تھا، پھر اس نے اسلام قبول کیا، پھر دوبارہ یہودی ہو گیا۔ انہوں نے مجھ سے اس معاملے کے بارے میں دریافت کیا، میں نے انہیں اس بارے میں بتایا، تو میں نے سیدنا معاذ رضی اللہ عنہ سے کہا: آپ تشریف رکھیں۔ انہوں نے فرمایا: ”میں اس وقت تک نہیں بیٹھوں گا جب تک میں اسے اسلام کی پیشکش نہیں کرتا، اگر یہ اسے قبول کر لے گا تو ٹھیک ہے، ورنہ میں اس کی گردن اڑا دوں گا۔“ سیدنا معاذ رضی اللہ عنہ نے اسے اسلام کی پیشکش کی، اس نے اسلام قبول کرنے سے انکار کر دیا، تو سیدنا معاذ رضی اللہ عنہ نے اس کی گردن اڑا دی۔ ایک دن سیدنا معاذ رضی اللہ عنہ نے مجھ سے دریافت کیا: ”تم قرآن کیسے پڑھتے ہو؟“ میں نے جواب دیا: میں قیام کی حالت میں، بیٹھ کر اور بستر پر لیٹ کر بھی اسے پڑھ لیتا ہوں۔ سیدنا ابوموسیٰ رضی اللہ عنہ بیان کرتے ہیں: میں نے سیدنا معاذ رضی اللہ عنہ سے دریافت کیا: آپ کیسے پڑھتے ہیں؟ انہوں نے فرمایا: ”میں اس کی تلاوت کرتا ہوں، پھر سو جاتا ہوں، پھر قیام کی حالت میں پڑھتا ہوں، تو میں اپنی نیند کے ذریعے اپنے قیام کے بارے میں قوت حاصل کرتا ہوں اور مجھے اپنی نیند سے بھی اس ثواب کی امید ہے جو اپنے قیام کرنے کے حوالے سے ثواب کی امید ہے۔“ [صحیح ابن حبان/كتاب الأشربة/حدیث: 5376]