سیدنا جابر بن سمرہ رضی اللہ عنہ بیان کرتے ہیں کہ ”جابیہ“ کے مقام پر سیدنا عمر بن خطاب رضی اللہ عنہ نے ہمیں خطبہ دیتے ہوئے بتایا: جس طرح میں (خطبہ دینے کے لیے) کھڑا ہوا ہوں، اسی طرح نبی اکرم صلی اللہ علیہ وسلم بھی کھڑے ہوئے اور آپ صلی اللہ علیہ وسلم نے ارشاد فرمایا: ”میرے ساتھیوں کے ساتھ اچھا سلوک کرنا، پھر ان کے بعد والوں کے ساتھ، پھر ان کے بعد والوں کے ساتھ، اس کے بعد جھوٹ پھیل جائے گا یہاں تک کہ آدمی قسم اٹھا لے گا اس سے پہلے کہ اس سے قسم مانگی جائے، اور گواہی پیش کر دے گا اس سے پہلے کہ اس سے گواہی طلب کی جائے، تم میں سے جو شخص جنت کے وسط میں داخل ہونا چاہتا ہو وہ (مسلمانوں کی) جماعت کو لازم پکڑ لے کیونکہ شیطان ایک شخص کے ساتھ ہوتا ہے اور وہ دو آدمیوں سے دور ہوتا ہے، خبردار! کوئی شخص کسی (اجنبی عورت) کے ساتھ تنہائی میں نہ رہے کیونکہ ان کا تیسرا شیطان ہو گا، خبردار! تم میں سے جس شخص کو اپنی نیکی اچھی لگے اور اپنی برائی بری لگے تو وہ مومن ہے۔“ [صحیح ابن حبان/كتاب الحظر والإباحة/حدیث: 5586]