خارجہ بن صلت تیمی اپنے چچا رضی اللہ عنہ کا یہ بیان نقل کرتے ہیں کہ وہ کسی قوم کے پاس سے گزرے جن میں ایک پاگل شخص تھا جسے لوہے میں باندھا گیا تھا، ان میں سے کسی نے کہا: کیا آپ کے پاس کوئی ایسی چیز ہے جس کے ذریعے آپ اس کا علاج کر سکیں؟ کیونکہ آپ کے ساتھی بھلائی لے کر آئے ہیں۔ راوی کہتے ہیں: تو میں نے تین دن تک اس پر سورہ فاتحہ پڑھ کر دم کیا، روزانہ میں دو مرتبہ اس کو دم کرتا تھا تو وہ ٹھیک ہو گیا، پھر اس شخص نے انہیں ایک سو بکریاں دیں، وہ نبی اکرم صلی اللہ علیہ وسلم کی خدمت میں حاضر ہوئے اور آپ صلی اللہ علیہ وسلم کے سامنے اس بات کا تذکرہ کیا، تو نبی اکرم صلی اللہ علیہ وسلم نے فرمایا: ”تم اسے کھا لو، کیونکہ جو شخص باطل دم کے ذریعے کھاتا ہے (وہ ممنوع ہے)، تم تو حق کے دم کے ذریعے کھانے لگے ہو۔“ [صحیح ابن حبان/كتاب الرقى والتمائم/حدیث: 6110]