مسلم بن یسار جہنی بیان کرتے ہیں: سیدنا عمر بن خطاب رضی اللہ عنہ سے اس بارے میں دریافت کیا گیا۔ ”اور جب تمہارے پروردگار نے اولاد آدم کو ان کی پشتوں سے ان کی ذریت کو نکالا اور ان لوگوں کو اپنی ذات کے بارے میں گواہ بنایا (اور دریافت کیا) کیا میں تمہارا پروردگار نہیں ہوں انہوں نے جواب دیا: جی ہاں۔“
سیدنا عمر بن خطاب رضی اللہ عنہ نے فرمایا: میں نے نبی اکرم صلی اللہ علیہ وسلم کو سنا آپ صلی اللہ علیہ وسلم سے اس آیت کے بارے میں دریافت کیا گیا، تو آپ صلی اللہ علیہ وسلم نے ارشاد فرمایا: بے شک اللہ تعالیٰ نے سیدنا آدم علیہ السلام کو پیدا کیا پھر اس نے ان کی پشت پر اپنا دست قدرت پھیرا اور ان کی پشت میں سے ان کی ذریت کو نکال دیا اور فرمایا میں نے ان لوگوں کو جنت کیلئے اور اہل جنت کے سے عمل کرنے کیلئے پیدا کیا ہے پھر اللہ تعالیٰ نے ان کی پشت پر ہاتھ پھیرا اور اس میں سے ان کی ذریت کو نکالا اور فرمایا میں نے ان لوگوں کو جہنم کے لیے اور اہل جہنم کے سے عمل کرنے کیلئے پیدا کیا ہے۔ ایک صاحب نے عرض کی: یا رسول اللہ ( صلی اللہ علیہ وسلم )! پھر عمل کیوں کیا جائے۔ نبی اکرم صلی اللہ علیہ وسلم نے ارشاد فرمایا: جب اللہ تعالیٰ نے کسی بندے کو جنت کیلئے پیدا کیا ہو، تو اس سے اہل جنت کے سے عمل کرواتا ہے، یہاں تک کہ وہ شخص اہل جنت کے سے عمل کرتے ہوئے مرتا ہے، تو اللہ تعالیٰ اسے جنت میں داخل کر دیتا ہے، جب اللہ تعالیٰ نے کسی بندے کو جہنم کے لیے پیدا کیا ہو، تو اس سے اہل جہنم کے سے عمل کرواتا ہے، یہاں تک کہ وہ بندہ اہل جہنم کے سے عمل کرتے ہوئے مر جاتا ہے، تو اللہ تعالیٰ اس وجہ سے اسے جہنم میں داخل کر دیتا ہے۔ [صحیح ابن حبان/كتاب التاريخ/حدیث: 6166]