سیدنا معاذ بن جبل رضی اللہ عنہ بیان کرتے ہیں: جب نبی اکرم صلی اللہ علیہ وسلم نے انہیں یمن بھیجا، تو نبی اکرم صلی اللہ علیہ وسلم انہیں تلقین کرنے کے لئے ان کے ساتھ نکلے۔ سیدنا معاذ اس وقت سوار تھے جب کہ نبی اکرم صلی اللہ علیہ وسلم ان کی سواری کے نیچے (پیدل) چل رہے تھے۔ جب آپ فارغ ہوئے، تو آپ نے ارشاد فرمایا: ”اے معاذ! ہو سکتا ہے اس سال کے بعد تمہاری مجھ سے ملاقات نہ ہو۔ ہو سکتا ہے، اب کی بار تمہارا گزر میری قبر اور میری مسجد کے پاس سے ہو، تو سیدنا معاذ رضی اللہ عنہ نبی اکرم صلی اللہ علیہ وسلم کی جدائی کے خوف سے رونے لگے پھر نبی اکرم صلی اللہ علیہ وسلم نے مدینہ منورہ کی طرف توجہ کی اور ارشاد فرمایا: میرے اہل بیت یہ سمجھتے ہیں کہ وہ لوگ باقی سب لوگوں کے مقابلے میں میرے زیادہ قریب ہیں، حالانکہ میرے سب سے زیادہ قریب پرہیزگار لوگ ہیں، خواہ وہ جو کوئی بھی ہوں اور خواہ وہ جہاں کہیں بھی رہتے ہوں۔ اے اللہ! میں ان کے لئے ایسی کسی چیز کے فساد کو حلال قرار نہیں دیتا جسے، تو نے صالح قرار دیا ہے۔ اللہ کی قسم! یہ لوگ میری امت کے دین کے حوالے سے اسی طرح اوندھے ہوں گے، جس طرح میدان میں برتن کو الٹا دیا جاتا ہے۔ [صحیح ابن حبان/كتاب الرقائق/حدیث: 647]