سیدنا ابوموسیٰ اشعری رضی اللہ عنہ بیان کرتے ہیں کہ نبی اکرم صلی اللہ علیہ وسلم نے مجھ سے فرمایا: ”دروازے کا دھیان رکھنا۔“ پھر ایک شخص آیا، اس نے اندر آنے کی اجازت مانگی، تو نبی اکرم صلی اللہ علیہ وسلم نے فرمایا: ”اسے اجازت دے دو اور اسے جنت کی خوشخبری دے دو۔“ تو وہ سیدنا ابوبکر صدیق رضی اللہ عنہ تھے۔ پھر ایک اور شخص آیا، اس نے اندر آنے کی اجازت مانگی، تو نبی اکرم صلی اللہ علیہ وسلم نے فرمایا: ”اسے اجازت دے دو اور اسے جنت کی خوشخبری دے دو۔“ وہ سیدنا عمر رضی اللہ عنہ تھے۔ پھر ایک اور شخص آیا، اس نے اندر آنے کی اجازت مانگی، تو نبی اکرم صلی اللہ علیہ وسلم خاموش رہے، پھر آپ صلی اللہ علیہ وسلم نے فرمایا: ”اسے اجازت دے دو، اسے جنت کی خوشخبری دے دو اور ساتھ اسے ایک شدید آزمائش کا شکار ہونا پڑے گا جو اسے لاحق ہوگی۔“ تو وہ سیدنا عثمان غنی رضی اللہ عنہ تھے۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 6911]