سیدنا عمران بن حصین رضی اللہ عنہ بیان کرتے ہیں: ایک شخص نبی اکرم صلی اللہ علیہ وسلم کی خدمت میں حاضر ہوا اس نے عرض کی: اے محمد صلی اللہ علیہ وسلم ! آپ کے مقابلے میں جناب عبدالمطلب قوم کے حق میں زیادہ بہتر تھے۔ وہ انہیں کھانے کے لئے (اونٹوں کے) جگر اور کوہان دیا کرتے تھے جبکہ آپ انہیں ذبح کر رہے ہیں۔ اس کے علاوہ اور بھی جو اللہ کو منظور تھا وہ اس نے کہا: جب وہ واپس جانے لگا، تو اس نے دریافت کیا: میں کیا پڑھا کروں نبی اکرم صلی اللہ علیہ وسلم نے فرمایا: تم یہ پڑھا کرو۔ ”اے اللہ! تو مجھے میری ذات کے شر سے بچا لے اور مجھے سب سے زیادہ ہدایت یافتہ معاملے پر پختہ کر دے۔“ پھر وہ شخص چلا گیا۔ اس نے اسلام قبول نہیں کیا تھا۔ (کچھ عرصے بعد وہ پھر آپ کی خدمت میں حاضر ہوا) اس نے کہا: اے اللہ کے رسول! میں آپ کے پاس آیا تھا۔ میں نے یہ عرض کی تھی کہ آپ مجھے ایسی چیز کی تعلیم دیجئے تو آپ نے یہ کہا: تھا۔ ”اے اللہ! تو مجھے میری ذات کے شر سے بچا لے اور مجھے سب سے زیادہ ہدایت والے معاملے پر پختہ کر دے۔“ اب جب میں نے اسلام قبول کر لیا، تو پھر میں کیا کہوں نبی اکرم صلی اللہ علیہ وسلم نے فرمایا: تم یہ کہو۔ ”اے اللہ! تو مجھے میری ذات کے شر سے بچا لے اور مجھے سب سے زیادہ ہدایت والے معاملے پر پختہ کر دے، اے اللہ! جو کچھ میں نے پوشیدہ طور پر کیا یا اعلانیہ طور پر کیا، جو کچھ میں نے غلطی سے کیا، جو کچھ جان بوجھ کے کیا اور جو کچھ بھی لا علمی سے کیا، ان سب کی مغفرت کر دے۔“ [صحیح ابن حبان/كتاب الرقائق/حدیث: 899]