سیدنا سلمان فارسی رضی اللہ عنہ سے روایت ہے کہ رسول اللہ صلی اللہ علیہ وسلم نے مجھ سے فرمایا: ”اے سلمان! کیا تمہیں معلوم ہے کہ جمعہ کا دن کیا ہے؟“ میں نے عرض کیا: اللہ اور اس کے رسول زیادہ جانتے ہیں۔ آپ صلی اللہ علیہ وسلم نے فرمایا: ”اے سلمان! جمعہ وہ دن ہے جس میں تمہارے باپ (آدم علیہ السلام) کو پیدا کیا گیا -یا انہیں جمع کیا گیا- اور میں تمہیں جمعہ کے دن کی فضیلت بتاتا ہوں: جو شخص جمعہ کے دن اس طرح طہارت حاصل کرتا ہے جیسا کہ اسے حکم دیا گیا ہے، پھر اپنے گھر سے نکل کر جمعہ کی نماز کے لیے آتا ہے اور خاموشی سے بیٹھ کر غور سے (خطبہ) سنتا ہے یہاں تک کہ اپنی نماز پوری کر لے، تو یہ عمل اس کے لیے پچھلے جمعہ سے لے کر اب تک کے گناہوں کا کفارہ بن جاتا ہے۔“
یہ حدیث صحیح الاسناد ہے، شیخین نے قرثع کے علاوہ اس کے تمام راویوں سے احتجاج کیا ہے، میں نے ابوعلی القاری کو کہتے سنا کہ میں نے قرثع الضبی کی تمام مسانید جمع کرنے کا ارادہ کیا کیونکہ وہ زاہد تابعین میں سے ہیں، لیکن ان کی مرویات کی کل تعداد دس تک بھی نہیں پہنچی۔ [المستدرك على الصحيحين/كتاب الجمعة/حدیث: 1041]