مالک بن مرثد اپنے والد سے روایت کرتے ہیں کہ انہوں نے کہا کہ میں نے سیدنا ابوذر رضی اللہ عنہ سے سوال کیا کہ کیا آپ نے رسول اللہ صلی اللہ علیہ وسلم سے لیلۃ القدر کے بارے میں پوچھا تھا؟ انہوں نے فرمایا: ”میں لوگوں میں سب سے زیادہ اس کے بارے میں آپ صلی اللہ علیہ وسلم سے سوال کرنے والا تھا“، میں نے عرض کیا: اے اللہ کے رسول! مجھے لیلۃ القدر کے بارے میں بتائیے کہ کیا یہ صرف رمضان میں ہوتی ہے یا کسی اور مہینے میں بھی؟ آپ صلی اللہ علیہ وسلم نے فرمایا: ”بلکہ یہ صرف رمضان ہی میں ہوتی ہے“، میں نے عرض کیا: اے اللہ کے رسول! کیا یہ انبیاء کے دور تک رہتی ہے اور جب انبیاء وفات پا جاتے ہیں تو یہ اٹھا لی جاتی ہے، یا یہ قیامت تک رہے گی؟ آپ صلی اللہ علیہ وسلم نے فرمایا: ”بلکہ یہ قیامت تک رہے گی“، میں نے عرض کیا: رمضان کے کس حصے میں ہے؟ آپ صلی اللہ علیہ وسلم نے فرمایا: ”اسے (رمضان کے) پہلے عشرے اور آخری عشرے میں تلاش کرو۔“ پھر رسول اللہ صلی اللہ علیہ وسلم کچھ اور باتیں فرمانے لگے، میں نے آپ صلی اللہ علیہ وسلم کی توجہ پاکر پھر عرض کیا: اے اللہ کے رسول! یہ (درمیان والے) بیس دنوں میں سے کس میں ہے؟ آپ صلی اللہ علیہ وسلم نے فرمایا: ”اسے آخری عشرے میں تلاش کرو اور اس کے بعد مجھ سے اس کے متعلق کچھ نہ پوچھنا۔“ پھر رسول اللہ صلی اللہ علیہ وسلم گفتگو فرمانے لگے، میں نے آپ صلی اللہ علیہ وسلم کی توجہ دیکھ کر پھر عرض کیا: اے اللہ کے رسول! میں آپ کو اللہ کی قسم دے کر پوچھتا ہوں کہ مجھے بتا دیں کہ یہ اس عشرے کی کن راتوں میں ہے؟ تو آپ صلی اللہ علیہ وسلم مجھ پر اس قدر ناراض ہوئے کہ اس سے پہلے یا اس کے بعد کبھی اتنے ناراض نہیں ہوئے تھے، اور فرمایا: ”اگر اللہ چاہتا تو تمہیں اس کی اطلاع دے دیتا، تم اسے آخری سات راتوں میں تلاش کرو۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كتاب الصوم/حدیث: 1613]