سیدنا انس بن مالک رضی اللہ عنہ سے روایت ہے کہ سیدنا حمزہ رضی اللہ عنہ کو ایک چھوٹی دھاری دار چادر (نمرہ) میں کفن دیا گیا، وہ چادر اتنی چھوٹی تھی کہ جب اسے ان کے سر پر ڈالتے تو ان کے پاؤں نکل جاتے اور جب پاؤں پر ڈالتے تو سر کھل جاتا، تو نبی کریم صلی اللہ علیہ وسلم نے حکم دیا کہ چادر سر کی طرف کر دیں اور پاؤں پر اذخر (گھاس) ڈال دیں، اور رسول اللہ صلی اللہ علیہ وسلم نے فرمایا: "اگر مجھے صفیہ (حمزہ کی بہن) کے غم زدہ ہونے کا ڈر نہ ہوتا تو میں حمزہ کو (میدان میں ہی) چھوڑ دیتا اور انہیں دفن نہ کرتا، یہاں تک کہ حمزہ پرندوں اور درندوں کے پیٹ سے (قیامت کے دن) محشور کیے جاتے۔"
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كتاب : الجهاد/حدیث: 2590]