سیدنا عوف بن مالک رضی اللہ عنہ سے روایت ہے کہ رسول اللہ صلی اللہ علیہ وسلم ایک لاٹھی ہاتھ میں لیے تشریف لائے، وہاں (صدقہ کی) کھجوروں کے خوشے لٹکے ہوئے تھے جن میں سے ایک خوشہ ردی اور سوکھی کھجوروں «الحشف» کا تھا، آپ صلی اللہ علیہ وسلم نے اس خوشے میں لاٹھی ماری اور فرمایا: ”اس صدقہ دینے والے کا کیا بگڑتا اگر وہ اس سے بہتر چیز صدقہ کرتا؟ یقیناً اس کھجور کے مالک کو قیامت کے دن ردی اور سوکھی کھجوریں ہی کھانے کو ملیں گی۔“ پھر فرمایا: ”اللہ کی قسم! تم ان باغات کو چالیس سال تک «عوافی» کے لیے چھوڑ دو گے۔“ لوگوں نے عرض کی: اللہ اور اس کے رسول بہتر جانتے ہیں، «عوافی» کیا ہیں؟ آپ صلی اللہ علیہ وسلم نے فرمایا: ”پرندے اور درندے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب التفسير/حدیث: 3163]