سیدنا عبداللہ بن عباس رضی اللہ عنہما سے مروی ہے کہ رسول اللہ صلی اللہ علیہ وسلم وادی ازرق کے پاس تشریف لائے اور فرمایا: یہ کون سا مقام ہے؟ لوگوں نے جواب دیا یہ ” وادی ازرق “ ہے۔ پھر آپ صلی اللہ علیہ وسلم نے فرمایا: گویا کہ میں سیدنا موسیٰ بن عمران رضی اللہ عنہ کو اترتے ہوئے دیکھ رہا ہوں اور وہ بلند آواز سے تکبیر پڑھ رہے ہیں۔ پھر آپ صلی اللہ علیہ وسلم مقام ” ثنیہ “ پر تشریف لائے، آپ صلی اللہ علیہ وسلم نے پوچھا: یہ کون سی جگہ ہے؟ لوگوں نے کہا: فلاں فلاں ثنیہ ہے، آپ صلی اللہ علیہ وسلم نے فرمایا: گویا کہ سیدنا یونس بن متی کو سرخ رنگ کی گھنگریالے بالوں والی اونٹنی پر سوار دیکھ رہا ہوں، جس کی لگام کھجوری چھال کی ہے اور آپ تلبیہ کہہ رہے ہیں اور آپ اونی جبہ زیب تن کیے ہوئے ہیں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كتاب التفسير/حدیث: 3352]