سیدہ اسماء بنت ابی بکر رضی اللہ عنہا فرماتی ہیں: جب: تَبَّتْ یَدَآ اَبِیْ لَھَبٍ (اللھب: 1) ” تباہ ہو جائیں ابولہب کے دونوں ہاتھ “۔ سورۃ نازل ہوئی تو ایک کانی عورت ام جمیل بنت حرب واویلا کرتے ہوئے آپ کی جانب آئی، اس کے ہاتھ میں ایک پتھر تھا اور وہ کہہ رہی تھی: ہم مذمم کا انکار کرتے ہیں اور اس کے دین کو نہیں اپناتے اور اس کے حکم کی تعلیم نہیں کرتے۔ اس وقت نبی اکرم صلی اللہ علیہ وسلم مسجد میں تشریف فرما تھے اور سیدنا ابوبکر رضی اللہ عنہ آپ کے پاس موجود تھے۔ جب سیدنا ابوبکر رضی اللہ عنہ نے اس کو دیکھا تو عرض کی: یا رسول اللہ صلی اللہ علیہ وسلم ! وہ عورت آ رہی ہے اور مجھے خدشہ ہے کہ یہ آپ کو دیکھ لے گی (تو نقصان پہنچائے گی) رسول اللہ صلی اللہ علیہ وسلم نے فرمایا: وہ مجھے ہرگز نہیں دیکھ سکے گی اور آپ صلی اللہ علیہ وسلم نے قرآن کی تلاوت کی اور اس کے ساتھ اپنی حفاظت کی۔ جیسا کہ قرآن میں ہے: وَاِذَا قَرَاْتَ الْقُرْاٰنَ جَعَلْنَا بَیْنَکَ وَ بَیْنَ الَّذِیْنَ لَا یُؤْمِنُوْنَ بِالْاٰخِرَۃِ حِجَابًا مَّسْتُوْرًا (الاسراء: 45) ” اور اے محبوب! تم نے قرآن پڑھا ہم نے تم پر اور ان میں کہ آخرت پر ایمان نہیں لاتے ایک چھپا ہوا پردہ کر دیا “۔ چنانچہ اس کو سیدنا ابوبکر رضی اللہ عنہ کا تو پتہ چلا لیکن وہ رسول اللہ صلی اللہ علیہ وسلم کو نہ دیکھ سکی۔ وہ بولی: اے ابوبکر رضی اللہ عنہ! مجھے اطلاع ملی ہے کہ تمہارے ساتھی نے میری برائی کی ہے۔ سیدنا ابوبکر رضی اللہ عنہ نے کہا: رب کعبہ کی قسم ہے، انہوں نے تو آپ کی کوئی برائی نہیں کی تو وہ یہ کہتی ہوئی واپس چلی گئی۔ قریش جانتے ہیں کہ میں ان کے سردار کی بیٹی ہوں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كتاب التفسير/حدیث: 3416]