سلیم بن عامر رضی اللہ عنہ کا بیان ہے کہ ایک شخص سیدنا ابوامامہ رضی اللہ عنہ کے پاس آیا اور کہنے لگا: اے ابوامامہ رضی اللہ عنہ! میں نے خواب میں دیکھا ہے کہ فرشتے جاتے آتے، اٹھتے بیٹھتے آپ پر درود بھیجتے ہیں۔ ابوامامہ رضی اللہ عنہ نے فرمایا: اللہ تعالیٰ مغفرت فرمائے، ہم تمہیں بھی اس کی دعوت دیتے ہیں۔ اگر تم چاہو تو تم پر بھی فرشتے درود بھیجیں گے۔ پھر آپ نے یہ آیت پڑھی: یٰٓاَیُّھَا الَّذِیْنَ ٰامَنُوا اذْکُرُوا اللّٰہَ ذِکْرًا کَثِیْرًا وَّ سَبِّحُوْہُ بُکْرَۃً وَّ اَصِیْلًا ھُوَ الَّذِیْ یُصَلِّی عَلَیْکُمْ وَ مَلٰٓئِکَتُہٗ لِیُخْرِجَکُمْ مِّنَ الظُلُمٰتِ اِلَی النُّوْرِ وَ کَانَ بِالْمُؤْمِنِیْنَ رَحِیْمًا “ (الاحزاب: 41,42,43) ” اے ایمان والو اللہ کو بہت یاد کرو، اور صبح و شام اس کی پاکی بولو، وہی ہے کہ درود بھیجتا ہے تم پر وہ اور اس کے فرشتے کہ تمہیں اندھیریوں سے اجالے کی طرف نکالے اور وہ مسلمانوں پر مہربان ہے “۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كتاب التفسير/حدیث: 3607]