سیدنا زید بن ارقم رضی اللہ عنہ فرماتے ہیں: ہم رسول اللہ صلی اللہ علیہ وسلم کے ہمراہ ایک غزوہ میں شریک ہوئے، ہمارے ہمراہ کچھ دیہاتی لوگ بھی تھے، ہم پانی کی طرف ایک دوسرے سے آگے نکلنے کی کوشش کرنے لگے (عموماً) دیہاتی ہم سے آگے نکل جایا کرتے تھے چنانچہ (اس دن بھی) ایک دیہاتی اپنے ساتھیوں سے آگے نکل گیا۔ اس نے حوض بھر لیا اور اس کے اردگرد پتھر رکھ کر اس کی حلقہ بندی کر لی۔ پھر اس کے ساتھی بھی اس کے پاس پہنچ گئے، ایک انصاری دیہاتی اس کے قریب آیا، اس نے اپنی اونٹنی کی لگام ڈھیلی کی تاکہ وہ پانی پی لے۔ اس دیہاتی نے اونٹنی کو پانی پلانے کی اجازت نہ دی تو اس انصاری نے وہاں سے ایک پتھر کھینچ دیا جس کی وجہ سے حوض کا پانی بہہ گیا۔ اس دیہاتی نے ایک ڈنڈا اٹھا کر انصاری کے سر پر مارا اور اس کا سر پھوڑ دیا۔ پھر وہ شخص منافقوں کے سردار عبداللہ بن ابی کے پاس آیا اور سارا واقعہ کہہ سنایا۔ عبداللہ بن ابی غصبناک ہوا پھر بولا: رسول اللہ صلی اللہ علیہ وسلم کے پاس جو دیہاتی رہتے ہیں، ان پر خرچ مت کرو حتیٰ کہ یہ خود ہی ان کے پاس سے بھاگ جائیں۔ وہ لوگ کھانے کے وقت رسول اللہ صلی اللہ علیہ وسلم کے ساتھ گفتگو کیا کرتے تھے، تو عبداللہ نے اپنے ساتھیوں سے کہا: جب یہ لوگ محمد صلی اللہ علیہ وسلم کے پاس سے اٹھ جائیں تب تم محمد صلی اللہ علیہ وسلم کے پاس کھانے کے لئے آ جاؤ تاکہ کھانا صرف آپ اور وہ لوگ کھائیں جو (اس وقت) ان کے پاس موجود ہوں۔ پھر اس نے اپنے ساتھیوں سے کہا: جب تم مدینہ میں لوٹ کر جاؤ گے تو جو عزت دار ہیں وہ ذلیلوں کو وہاں سے نکال دیں۔ سیدنا زید کہتے ہیں: میں اپنے چچا کے پیچھے سوار تھا۔ میں نے عبداللہ کی (یہ بکواس) سن لی۔ ہماری اس کے ساتھ رشتہ داری بھی تھی، میں نے اپنے چچا کو بتایا۔ وہ رسول اللہ صلی اللہ علیہ وسلم کے پاس گئے اور آپ کو واقعہ بتایا۔ رسول اللہ صلی اللہ علیہ وسلم نے اس کو بلوایا، وہ آپ صلی اللہ علیہ وسلم کے پاس آ کر قسم کھا کر انکار کر گیا اور معذرت کر گیا۔ رسول اللہ صلی اللہ علیہ وسلم نے اس کی بات مان لی اور میری بات تسلیم نہ کی، پھر میرے چچا میرے پاس آئے اور بولے: تجھے تو رسول اللہ صلی اللہ علیہ وسلم نے ناپسند کیا اور جھٹلا دیا ہے اور مسلمانوں نے بھی تجھے جھٹلا دیا ہے (یہ بات سن کر) مجھ پر غم (کا ایسا کوہ گراں) آن پڑا کہ زندگی میں کبھی بھی میں اس قدر غمزدہ نہ ہوا تھا۔ اس کے بعد میں رسول اللہ صلی اللہ علیہ وسلم کے ہمراہ سفر کر رہا تھا اور میرا سر غم کی وجہ سے جھکا ہوا تھا۔ رسول اللہ صلی اللہ علیہ وسلم میرے پاس تشریف لائے میرے کان کو تھوڑا سا مسلا اور میرے قریب ہو کر آپ مسکرائے (اس وقت مجھے اس قدر خوشی ہوئی کہ) اگر اس کے بدلے مجھ کو دنیا اور جنت بھی دے تو میں قبول نہ کروں۔ پھر سیدنا ابوبکر رضی اللہ عنہ میرے پاس آئے اور پوچھنے لگے: رسول اللہ صلی اللہ علیہ وسلم نے تم سے کیا کہا، میں نے کہا: آپ نے مجھ سے کوئی بات نہیں کہی سوائے اس کے کہ میرا کان مسل کر مجھے ہنسایا ہے۔ سیدنا ابوبکر رضی اللہ عنہ نے کہا: تمہیں خوشخبری ہو۔ پھر سیدنا عمر رضی اللہ عنہ میرے پاس آئے اور پوچھنے لگے: رسول اللہ صلی اللہ علیہ وسلم نے تم سے کیا بات کی؟ میں نے ان کو بھی وہی جواب دیا جو سیدنا ابوبکر رضی اللہ عنہ کو دیا تھا۔ جب صبح ہوئی تو رسول اللہ صلی اللہ علیہ وسلم نے سورۃ المنافقون: اِذَا جَآءَکَ الْمُنٰفِقُوْنَ قَالُوْا نَشْھَدُ اِنَّکَ لَرَسُوْلُ اللّٰہِ) (سے شروع کی حتیٰ کہ) الَّذِیْنَ یَقُوْلُوْنَ لَا تُنْفِقُوْا عَلٰی مَنْ عِنْدَ رَسُوْلِ اللّٰہِ حَتّٰی یَنْفَضُّوْا تک پہنچے (پھر تلاوت کرتے رہے) حتیٰ کہ لَیُخْرِجَنَّ الْاَعَزُّ مِنْھَا الْاَذَلَّ تک پہنچے۔ ٭٭ امام بخاری رحمۃ اللہ علیہ اور امام مسلم رحمۃ اللہ علیہ نے اسحاق سبیعی کے حوالے سے سیدنا زید بن ارقم رضی اللہ عنہ سے اس حدیث کے کچھ الفاظ نقل کئے ہیں اور امام بخاری رحمۃ اللہ علیہ نے ابواسحاق کی متابعت میں درج ذیل سند کے ہمراہ اس کو نقل کیا ہے۔ عن شعبۃ، عن الحکم، عن محمد بن کعب القرظی عن زید بن ارقم لیکن شیخین رحمۃ اللہ علیہما نے اس مفصل حدیث کو نقل نہیں کیا حالانکہ اس کی سند صحیح ہے۔ [المستدرك على الصحيحين/كتاب التفسير/حدیث: 3854]