سیدنا عبداللہ بن عباس رضی اللہ عنہما سے روایت ہے کہ ولید بن مغیرہ، نبی اکرم صلی اللہ علیہ وسلم کی خدمت میں آیا۔ آپ نے اس کے سامنے قرآن کریم کی تلاوت فرمائی، یوں لگ رہا تھا کہ آپ کو اس پر ترس آ رہا ہے۔ یہ بات ابوجہل تک پہنچی، یہ اس کے پاس گیا اور بولا: اے چچا جان۔ آپ کی قوم آپ کے لئے چندہ جمع کر رہی ہے۔ اس نے وجہ پوچھی تو اس نے کہا: تجھے دینے کے لئے کیونکہ تو محمد صلی اللہ علیہ وسلم کے پاس گزشتہ معاملات کا تصفیہ کرنے گیا ہے۔ اس نے کہا: تمام اہل قریش اس بات سے باخوبی آگاہ ہیں کہ میں ان سے زیادہ امیر ہوں۔ اس نے کہا: تو پھر اس کے بارے ایسی بات کر جو تیری قوم کو پہنچ جائے کہ تو اس کا منکر ہے۔ اس نے کہا: میں کیا بولوں؟ خدا کی قسم! تم میں مجھ سے بڑھ کر کوئی اشعار کو جاننے والا نہیں ہے اور نہ ہی رجز اور قصیدہ کے متعلق مجھ سے زیادہ کوئی جاننے والا ہے اور نہ جنات کے اشعار کو۔ خدا کی قسم! یہ جو کچھ بولتا ہے، اس کی کوئی مثال نہیں ہے اور خدا کی قسم! وہ جو کچھ بولتا ہے، اس میں مٹھاس اور خوبصورتی ہے۔ اس کی اعلیٰ (قسم) منافع بخش ہے اور اس کی اسفل بھی سرسبز ہے اور اس کی فاتحہ غلبہ دینے والی ہے۔ اس نے کہا: تیری قوم اس وقت تک تجھ سے راضی نہیں ہو گی جب تک تو اس کے متعلق ہرزہ سرائی نہیں کرے گا۔ اس نے کہا: مجھے سوچنے کا موقع دو۔ پھر وہ سوچنے کے بعد بولا: یہ جادو ہے جو دوسروں پر اثر کر دیتا ہے۔ تب یہ آیت نازل ہوئی: ذَرْنِیْ وَ مَنْ خَلَقْتُ وَحِیْدًا (المدثر: 11) ” اسے مجھ پر چھوڑ جیسے میں نے اکیلا پیدا کیا۔“ ٭٭ یہ حدیث امام مسلم رحمۃ اللہ علیہ کے معیار کے مطابق صحیح الاسناد ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كتاب التفسير/حدیث: 3914]