سیدنا عبداللہ بن عباس رضی اللہ عنہما سے روایت ہے، انہوں نے فرمایا: ”سیدنا ابراہیم علیہ السلام آئے تو انہوں نے اسماعیل علیہ السلام کو زمزم کے پیچھے اپنا ایک گھر ٹھیک کرتے ہوئے پایا۔ ابراہیم علیہ السلام نے ان سے فرمایا: اے اسماعیل! بیشک تمہارے رب نے مجھے بیت اللہ تعمیر کرنے کا حکم دیا ہے۔ تو اسماعیل علیہ السلام نے ان سے کہا: پھر آپ اپنے رب کی اس بات میں اطاعت کریں جس کا اس نے آپ کو حکم دیا ہے۔ ابراہیم علیہ السلام نے فرمایا: تو تم اس کام میں میری مدد کرو۔ اسماعیل علیہ السلام نے کہا (کہ وہ تیار ہیں)، پس وہ ان کے ساتھ کھڑے ہو گئے۔ ابراہیم علیہ السلام اسے تعمیر کرنے لگے اور اسماعیل علیہ السلام انہیں پتھر پکڑانے لگے، اور وہ دونوں (یہ دعا) پڑھتے جاتے تھے: ﴿رَبَّنَا تَقَبَّلْ مِنَّا إِنَّكَ أَنْتَ السَّمِيعُ الْعَلِيمُ﴾ ”اے ہمارے رب! ہم سے (یہ خدمت) قبول فرما، بیشک تو ہی سب کچھ سننے والا اور جاننے والا ہے۔“ [سورة البقرة: 127]
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كتاب : تواريخ المتقدمين من الأنبياء والمرسلين/حدیث: 4069]