ایاس بن سلمہ اپنے والد سے روایت کرتے ہیں، انہوں نے کہا: رسول اللہ صلی اللہ علیہ وسلم نے سیدنا ابوبکر رضی اللہ عنہ کو امیر مقرر فرمایا اور ہم نے بنو فزارہ کے کچھ لوگوں کے خلاف جنگ کی، جب ہم پانی کے قریب پہنچے تو سیدنا ابوبکر رضی اللہ عنہ کے حکم پر ہم نے آرام کیا، پھر جب ہم صبح کی نماز پڑھ چکے تو ان کے حکم پر ہم نے اچانک چھاپہ مارا، ہم پانی پر پہنچے اور وہاں موجود لوگوں کو قتل کیا، پھر لوگوں کا ایک گروہ پیچھے ہٹا جن میں بچے اور عورتیں تھیں جو پہاڑ کی طرف بھاگ نکلنے کے قریب تھے، تو ہم نے ان کے اور پہاڑ کے درمیان تیر چلایا جس سے وہ رک گئے، میں انہیں ہنکا کر سیدنا ابوبکر رضی اللہ عنہ کے پاس لے آیا، ان میں بنو فزارہ کی ایک عورت تھی جس نے چمڑے کا لباس پہن رکھا تھا اور اس کے ساتھ اس کی بیٹی تھی جو عرب کی خوبصورت ترین عورتوں میں سے تھی، سیدنا ابوبکر رضی اللہ عنہ نے وہ لڑکی مجھے انعام میں دے دی، میں مدینہ منورہ آیا تو رسول اللہ صلی اللہ علیہ وسلم مجھے بازار میں ملے اور فرمایا: ”اے سلمہ! تیرے باپ کا بھلا ہو، یہ عورت مجھے دے دو“، میں نے عرض کی: ”اللہ کی قسم! اے اللہ کے رسول! میں نے ابھی تک اسے ہاتھ بھی نہیں لگایا اور یہ آپ ہی کی ہے“، پھر رسول اللہ صلی اللہ علیہ وسلم نے اسے مکہ بھیج دیا اور اس کے بدلے ان مسلمان قیدیوں کا فدیہ ادا کر کے رہا کروایا جو مشرکین کے قبضے میں تھے۔
امام مسلم نے اسے اس سیاق کے علاوہ روایت کیا ہے۔ [المستدرك على الصحيحين/كتاب المغازي والسرايا/حدیث: 4382]